GINEBRA, SUISA, AFP.- E Komisario di Derechi Humano di Nashon Uni, Michelle Bachelet, a informá ku a renobá e Memorando di Entendimentu ku e gobièrnu di Venezuela. E akuerdo lo oumentá e koperashon humanitario den e pais.
E akuerdo firmá aña pasá den sèptèmber a keda prolongá ku un aña mas segun indikashon di Bachelet durante e di 45 seshon di Konseho di Derechi Humano di Nashon Uní na Ginebra.
E akuerdo nobo lo oumentá e kantidat di ofisialnan di derechi humano ku tres biaha su kantidat den e pais. Bachelet a reportá avanse riba e protokòlnan di polis desde ku a firma e akuerdo.
