Mc William ta bolbe lansa e gritu
WILLEMSTAD.- Lider di partido MAN, Giselle Mc William ta bolbe lansa e gritu pa baha e akseins i/òf eliminá un di e “schakel”nan di OB riba kombustibel. El a trese esaki dilanti for di 2022 i a bolbe ripití esaki na mart 2026. Te ainda gabinetenan Pisas no ta hasi niun moveshon den e direkshon aki.
Regulatory Authority of Curaçao (RAC) a anunsiá ayera ku entrante djamars 29 di sèptèmber próksimo preis di gasolin na pòmp ta subi di 2,597 florin pa 2,725 florin pa liter. Un subida di kas 13 sèn pa liter. Pa loke ta disel, esaki ta subi di 2,373 florin pa 2,819 florin pa liter ku ta un oumentu di kasi 45 sèn pa liter.
Tarifa di awa i koriente tambe ta subi entrante promé di òktober awor. Koriente ta subi di 0,6307 florin pa 0,6956 pa kWh pa e promé 250 kWh na uso. Esaki ta un oumento di mas ku 6 sèn pa kWh. Tarifa di awa ta subi di 8,4009 florin pa 9,1106 florin pa meter kúbiko pa uso di e promé 9 meter kúbiko di awa. Esaki ta un oumento di kasi 71 sèn pa meter kúbiko.
Mc William ta indiká riba retnan sosial ku e situashon ta hopi serio i ku e oumento di kosto di bida aki lo ta devastador pa kasnan di famia i komersio. Na su opinion gobièrnu mester bini ku un plan awor pa suavisá e impakto di e oumentonan aki pasobra no por warda mas. “No solamente pa esunnan ku ta biba kaba bou di e liña di pobresa, sino tambe pa e klase trahadó/klase medio ku ta e grupo ku poko poko pero sigur ta disparsé den e pais aki.”
E ta mustra ku den pasado partido MAN a sugirí den pasado diferente alternativa manera baha e OB riba gasolin i diesel i/òf baha OB riba transporte na momento di importashon. Tambe el a enfatisá ku mester bini ku un kampaña agresivo di konsientisashon riba uso di awa. E oumento di preis di kombustibel komo konsekuensia di e guera entre Merka, Israel i Iran.
Mc William for di mart 2026 a indiká ku e guera aki ta bai afektá Kòrsou tambe i ku mester ta prepará i antisipá pa trese un solushon i mengua e efektonan negativo riba sektor komersial i riba kasnan di famia. El a mustra na e momento ei ku ta kobra 41 sèn di akseins riba kada liter di gasolin. Tambe tin den e tarifa 6 porshento di OB pa “groothandel”, ku ta ora CUROIL ta bende ku e pòmpnan di gasolin, i 6 porshento di OB pa “kleinhandel” ku ta ora e kliente kumpra gasolin na pòmp.
“Gobièrnu mester usa e eksperensia i konosementu di 2022 pa baha preis di gasolin, pasombra ku un oumento riba gasolin ku lo nifiká un oumento di awa i koriente lo oumentá kosto di bida i kosto di hasi negoshi drástikamente”, Mc William a deklará. Banda di su proposishon pa baha akseins i/òf eliminá un “schakel” di OB, Mc William ta proponé alabes pa gobièrnu laga Banko Sentral hasi un análisis di e diferente senarionan ku por bai afektá kosto di bida , p’asina prepará un maneho pa mengua e sunami di inflashon ku lo yega Kòrsou tambe.
