Williams (Willy) Sanchez Chirino

 

E deporte di Body Building ta halando bastante atenshon na Kòrsou tambe. Williams Sanchez Chirino konosí komo Willy a konta e bida di un body-builder. El a partisipá na un kompetensia na Medellín di Mister Amérika, partisipando den 2 kategoria respektivamente esun te 90kilo kual el a gana e título máksimo ku ta e promé lugá i e mesun dis tambe el a partisipá na Overall Winner kaminda Willy a sali na di dos lugá. Esei ta nifiká ku e promé tres lugánan di e overall winner ta haña nan karnèt profeshonal. Asina Willy a haña su promé karnèt ofisial. Siguiente dia di e kompetensia ei el a tuma parti na e kompetensia di bòdinan klásiko i el a gana su kompetensia i a sigui pa esun overall kaminda tambe el a gana i asina a haña su di dos karnèt profeshonal. Aña pasá tambe segun Willy el a tuma parti na tur e dos kategorianan i a kue di dos lugá. El a sigui perseverá pasobra ta rònt mundu ta partisipá na e evento ei. E ta konosí mundialmente i mirando ku el a kue di dos lugá, el a traha mas duru i e siguiente aña el a kue títulonan máksimo.

Nada fásil

Ser un body-builder no ta fásil. E ta nifiká hopi disiplina, trabou duru pa mantené un título i logra aun mas. Willy a konta Djasabra ku e ta hisa peso ku for di su 17 aña. I na 2002 i 2003 el a kompetí tempu e tabata di coach pa de Caster. Na 2003 Willy a kibra ora su coach a bira malu i a fayesé. Ta e coach a push e i gui’é den e kaminda pa logra. Pero Willy a retirá di e bida di body-builder pero na 2009 el a bin bèk. Na 2010 el a bolbe kompetí i asina a sigui ku e kompetenshanan.

 

E bida di body-builder

E bida di body-builder ta dushi sino nos lo no hasié. Ta dietnan sumamente estrikto ku kasi bo ta muri. Por ehèmpel e tin diet di 2 siman di piská, herebé e piská so. Ta dianan ku e tin di usa tantu vitamina. Pero e ta dushi pasobra bo ta reta bo mes. Bo ta pone meta bo dilanti pa logr’é. E ta trese sakrifisio kuné. Hopi hende gust’é pero tiki ta yega pasobra e sakrifisio bo mester ta mentalmente fuerte pa mantené e bida di body-builder.

 

Willy a sigui konta ku na momentu di preparashon ta tur dia e tin di sigui e dietnan ei, e ta bira manera beibi, kada tres ora kome, sierto ora pa trein i bo tin di drumi pero bo no ta haña ni chèns pa esei.

 

Awor kos a kuminsá

“Nos tur tin un soño i un di mi soñonan ta pa haña mi karnèt profeshonal i e tin esei. Mi por bai kòntèstnan rònt mundu pero no komo amatùr mas. Awor kos a kuminsá”, Willy a enfatisá. I awor e ta profeshonal e tin di kompetí ku e profeshonalnan rònt mundu. Ta otro kos esaki ta.

 

Willy ta nutrishonista i treiner personal. El a trein diferente hende ku a bai kompetenshanan grandi. E sa trein hende ku ke baha òf subi di peso. E ta bon prepará asina el a enfatisá. I loke e body-builder por hasi robes ta hopi. Tin hopi body-builder ku no ta sigur di nan mes. Un barku mester tin un kapitan so i no dos. I komo e body-builder ei no ta sigur di nan mes nan ta kuminsá puntra aki i aya. Esei ta e fout mas grandi ku un body-builder por hasi. Bo no por tende aki i aya i bo ta bai mas atras asina ei.

 

Aktualmente e tin su propio gym djis tras di Micky’s Mufler na Rooseveltweg. Promé Willy tabata na WTC pa basta aña. E ta habri di 5.15 di mainta te 9 or di anochi. Su paketenan ta sumamente atraktivo i pa muchanan tin preis apart. Tin zumba, kaminda pa baña i tin produktonan pa bende. E tin profeshonalnan pa guia esnan ku ta bin trein na e gym. Willy su kasá mes tambe ta un entrenadó. Mirando e deporte di fitness aki, Willy a splika Djasabra ku Kòrsou su mundu di fitness aktualmente a kuminsá subi. Tin hopi gym aktualmente i esei ta un tendensia mundial. Na Kòrsou tin hopi potensial i diferente profeshonal ku ta sakando kara den eksterior. Pa chikí ku Kòrsou ta, e ta bon konosí den eksterior manera Roelly Winklaar.

 

Konseho pa baha òf subi

Pa esun ku ke baha di peso i esun ku ke subi di peso ta dos kos diferente. Segun Willy si e konsultá hende ku ke baha di peso ta su eksámen médiko ta importante pa sa di kiko e persona ei ta sufri. Mester sa ki problema e hende tin i tambe pa sa su tipo di sanger. Mester buska hende ku sa di a materia aki. Hopi hende por baha di peso pero si no tin hende profeshonal manda di bo, bo por bira malu. Por laga hende baha 10 kilo rápido pero si e no bai balansa e hende ta subi dòbel bèk i bira malu. Pa esun ke baha òf subi di peso buska hende profeshonal.

Pa loke ta subi di peso Willy a bisa ku no ta nada difísil. Ta kome bo tin di kome pero bahamentu si ta difísil. Pero asta esun ku ke subi di peso tin di buska konseho serka un profeshonal. Esun ku ke subi di peso ku kalidat ta esensial gym i kome balansá.

 

Bebe hopi awa

Nos ta biba den un pais bastante kalor. E temperatura i trópiko aki ta importante pa hende mester bebe 2 liter i mei di awa pa dia. Hopi hende no ta bebe awa i nan por haña problema di nir. Ménos awa ta hiba nos kurpa atras. I awa di mas no ta malu pasobra bo ta urin’é i sak’é afó. Dependé e wer bo tin di hidratá bo mes. Willy a yega di bebe 5 te asta 6 liter di awa pa dia.

 

LAGA UN KOMENTARIO

Please enter your comment!
Please enter your name here