Bai bèk na bo rais (back to your hood)

Shardenia Felicia ku proyekto na Radulphus i St. Paulus

Shardenia Felicia, un di nos yu di tera nan ku ta bria na Ulanda, ta konta un historia di inspirashon i perseveransia. Despues di a lanta na Kòrsou, el a persiguí su soño di arte i a bai studia na Ulanda, kaminda awor e ta fungi komo dosente di arte. Aunke su bida ta na 9 ora leu, su raisnan ta derá den tera di Kòrsou. Shardenia a kuminsá su kaminda na Instituto Buena Bista (IBB), i awor e ta finalisá un proyekto inspirativo kaminda el a traha huntu ku hóbennan di skol, pa transmití su pashon i konosementu.

Pa e programa di djasabra, ta semper un plaser pa papia tokante di arte, sigur ora e ta trata di inspirá nos hóbennan pa deskubrí e kreatividat ku tin den nan.

No ta fásil drenta akademia di arte na Ulanda

“Mi ta Shardenia Felicia,” e ta kompartí ku un sonrisa. “Na 2014 mi a tuma e desishon pa bai studia arte. Pero pa drenta den un akademia di arte na Ulanda, no tabata fásil.”
E ta konta ku na e momentu ei, apénas e tabata konosé Instituto Buena Bista (IBB), pero el a disidí di hasi e paso i apliká. “Mi a haña e chèns, i mi a keda einan dos aña. Despues di esaki, mi a bai studia na KABK na Den Haag, kaminda mi a hasi mi Bachelor den Fine Art. Ora mi a kaba, mi a sigui ku un Master den Artistic Research.”

Shardenia ta sigui konta ku despues di su estudionan, el a kuminsá traha mesora komo yùfrou di arte na skol primario, aunke e no tabata tin e título formal di yùfrou pa duna arte. “Mi tabata hasi e trabou paso mi gusta arte i alabes pa gana eksperensia. Banda di esaki, mi ta kontentu pa sigui desaroyá mi propio arte. Mi a partisipá den algun eksposishon i proyekto, i na mart mi a skibi un aplikashon pa un tarea nobo, i mi a haña e oportunidat.”

E Proyekto: Bai bèk na bo rais di arte i edukashon

E proyekto ta un kolaborashon entre Instituto Buena Bista (IBB) i Amarte Fonds di Ulanda, ku ta kubri henter e trayekto kreativo. “E proyekto ta duna bo libertat pa bo mes disidí kon bo ta hinka bo idea den e otro, i asina skibi bo aplikashon,” Shardenia ta splika.

E tema prinsipal tabata “bai bèk na bo rais.” Tur partisipante por skibi kiko nan ke hasi relashoná ku  Kòrsou, òf kreá un proyekto ku tin un balor real pa e isla. “Komo mi ta traha na un skol primario, mi sa ku hóbennan ta nos futuro. Tur kambio ku bo ke mira den un komunidat, mester kuminsá na nan,” e ta bisa. Pa e motibu ei, Shardenia a skohe pa su proyekto ta mará na skol. Na prinsipio, el a planifiká pa traha ku Regina Pacis i Radulphus, pero, lamentablemente Regina Pacis no ta eksistí mas, I a kambia su eskoho pa St Paulus VSBO. “E skol aki tabata un skol ku mi mes a haña lès di téknika ora mi tabata bai Maris Stella,” e ta konta ku nostalgia. El a tuma kontakto ku e dosentenan di skolnan i a kuminsá traha direktamente ku e hóbennan.

Idea patras di e proyekto: Kòrsou ku un otro wowo

E idea di e proyekto ta salí for di un pensamentu profundo ku Shardenia tin den su kurason promé ku el a bai for di Kòrsou. “Mi ta sinti ku tin bia, nos komunidat ta un tiki dividí, i mi ke mira un kambio den esaki,” e ta bisa. Promé ku el a sali for di Kòrsou na 2016, el a bai ku e deseo pa eventualmente bolbe i kontribuí ku un proyekto ku tin un mensahe di union i reflekshon. “Mi tin un vishon di Kòrsou, pero esaki no ta nifiká ku tur hende tin e mesun vishon,” e ta splika. Pa e motibu ei, Shardenia a puntra kada un skol un pregunta importante: “Kiko ta bo idea di Kòrsou awor, i kiko bo ke mira kambia?” El a hasi esaki ku e intenshon pa su perspektiva no ta sentral den e proyekto, i pa duna espasio pa e hóbennan mes reflehá nan pensamentu i nan deseo pa nan pais.

Na final, e meta ta pa trese dos grupo di studiante huntu, pa nan por skucha i mira kiko e otro grupo ta pensa di Kòrsou. “Asina tur hende por haña un bista mas amplio di kon nos pais ta mustra i kon nos mes ta mira nos futuro,” Shardenia ta bisa ku un sonrisa.

Diferensia den Perspektiva: VSBO VS HAVO/VWO

Shardenia ta bisa ku, durante e proyekto, el a nota ku tur dos grupo di hóben tabata interesá pa un kambio, i e ta mira hopi similaridat den nan aspirashon. Por ehèmpel, nan tur ta deseá un Kòrsou mihó i limpi. E diferensia mas grandi tabata e manera ku nan a visualisá esaki. E muchanan di Radulphus, tabata pinta tur loke nan tin den nan kabes, inkluí e problema i desafionan. E resultado tabata mas realístiko i ta reflehá direktamente e kosnan ku nan ta sinti den nan dia diario.

Na otro banda, e studiante di Sint Paulus, tabata orientá mas positivo. Nan a pinta loke nan ta mira bunita di Kòrsou, i a enfatisá riba e balornan i kultura ku nan ta sinti orguyo di dje.

Shardenia ta buta énfasis ku niun di dos enfoke no ta “bon” òf “malu”: ta solamente un diferensia den e manera ku kada grupo ta ekspresá nan pensamentu i sentimentu riba nan pais.

Un Eksposishon pa demonstrá nos kreatividat i perspektiva

Tur idea ku kada skol a pinta riba papel lo forma un obra grandi. Ademas, tur studiante lo por kontribuí ku un video chikí ku ta konta nan eksperensia i loke nan a logra durante e proseso di trabou. E eksposishon lo tuma lugá na IBB i lo ta habri pa tur hende, transformando e evento den un oportunidat pa kompartí i selebrá kreatividat di nos hóbennan. E idea ta ku kada studiante por desaroyá nan obra segun nan interes personal. E studio ta amplio i ta duna libertat, i di e trayekto nan por saka e esensia ku nan a hinka aden. Ora un studiante duna di su parti i eksplorá su kreatividat, e por logra hopi i kontribuí na un resultado final ku ta impaktante.

Master in Artistic Research: Investigashon i profundisashon

Shardenia a kompletá su Master in Artistic Research, un programa ku ta diferente for di un estudio tradishonal di Fine Art. Miéntras Fine Art ta enfoká riba kreashon di arte, e master ta enfoká riba e parti di investigashon: bo ta traha bo obra, pero ku un bista investigativo riba dikon i kon bo ta traha.

Durante su dos aña di estudio, Shardenia a hasi investigashon di artistanan, ken e artista ta te ku su kuminda faborito, di kual el a dokumentá i kompilá esaki pa su tésis. E master a duna e un profundisashon ku su bachelor no tabata ofresé, paso durante di su bachelor e tabata sinti falta di guia profundo. Despues di kaba su bachelor, el a pensa si sigur e ke sigui den e kaminda di arte òf no, pero ku e master, el a deskubrí ku su futuro ta definitivamente den e arte. Shardenia ta hopi kontentu ku e proseso i ku e a logra e nivel di investigashon i kreatividat ku e tabata buska.

Pintura, ‘Performance’ i Diversidat Kreativo

Shardenia ta konfesá ku su inklinashon mas grandi ta pintura, pero su obra no ta limitá na un solo forma. E ta hasi ‘performance art’, un manera di aktua ku ta sirbi komo arte, eskultura, animashon di video, i otro tipo di kreashon. Aunke e ta eksplorá diferente medio, pintura ta keda e parti mas sentral di su karera artístiko. Durante di su 9 aña nan di estadia na Ulanda, e ta mira un diferensia entre e dos paisnan, pero e ta menshoná ku ta nos mes hendenan. Hende grandi na Ulanda ta mas interesá den arte, i esaki Shardenia a eksperensiá den su mes eksposishonnan. Pero ora e wak skolnan na Kòrsou, e ta mira ku nos hóbennan tin hopi interes den arte, sigur na skolnan manera Sint Paulus. Hopi hende ta stòp di pinta paso nan no ta mira e importansia òf tin hopi otro kos ku ta keda ofresé ku nan ta pensa ta mas importante.

IBB: E brùg di arte entre Kòrsou i Ulanda

Si un hóben di Kòrsou ta interesá den arte, e por bai Ulanda pa ekspandé su konosementu, pero e ta dependé di e persona mes. Tin diferente manera pa eksplorá arte. Por ehèmpel, si bo ta skohe pa bira yùfrou di skol, esaki lo duna bo un base pa hasi bo arte. Pero si bo kier bai kompletamente den karera di arte, e ta konsehá nos hóbennan pa nan Ulanda. IBB ta un skol ku ta prepará bo promé pa e paso aki. Ora Shardenia a yega Hulanda, hopi kos ku ta normal den e pais no tabata normal na Kòrsou, pero dor di e preparashon ku el a haña na IBB, e tabata tin un bon fundeshi. IBB ta funshoná komo e brùg di arte entre Kòrsou i Ulanda. Mas i mas arte ta surgi na Kòrsou, tambe dor di otro instansianan manera Museo di Kòrsou. Den e añanan ku Shardenia bai afó i bini kas bèk, hopi kos a kambia.

Bo ta imaginá bo ta pará dilanti klas?

“No, mi no a imaginá mi mes di ta un dosente,” Shardenia ta bisa. Promé ku el a bai studia arte, e tabata studia ‘Operatie Assistant’. E ta rekordá ku ora e tabata den kamber di operashon, úniko kos ku tabata tin na su mente tabata: “ki ora mi ta kaba pa mi bai pinta?” Hopi hende no ta komprondé e konsepto di arte. Arte ta hopi grandi. Tin diferente forma i método, i tambe bo no mester ta perfekto. Kada hende por ekspresá nan mes den arte. Pero, ademas di ekspreshon, bo mester siña analisá i haña un wowo kritiko pa komprondé arte mas profundo. Den su temporada di skol, aparte di traha obra, tabatin un parti di teoria. Tur siman bo por traha riba bo obra i asistí seminarionan kaminda bo por apliká teoria. Ademas, tur siman riba djaluna, tur studiante mester a presentá algu. Esaki ta duna oportunidat pa ta mas krítiko i komprondé e obra di otro. Shardenia ta enfatisá ku bo mester tin pashon, determinashon i ta desidido.

Bida di studiante tabata na Ulanda

Shardenia ta konta ku su bida di studiante tabata bastante pisá, aunke e ta konsiderá e un bendishon. Durante su Bachelor, el a haña dos yu ku a impakta su bida i su arte, pero e no a stòp. El a disidí di sigui, i esaki a krea un tono personal i outobiográfiko na su arte.

Den su lastu aña di Bachelor, Shardenia a traha un video ku su yu den dje, ku ta mustra su bida i su eksperensia personal. E arte ta bastante emoshonal i simbóliko, i hopi hende for di mundu di arte no ta komprondé kompletamente. Pero e dosentenan si a komprondé, nan a duna kòmplimènt, i rekonosé e nifikashon tras di e video. Nan a nota ku ta hopi importante pa integrá bo konsepto personal pa krea arte ku tin sentido i signifikante.

Nada no a stroba Shardenia pa logra loke e

Shardenia ta konta ku, apesar di tur su desafionan, nada no a stroba su determinashon pa logra loke e ke. Tin momentunan ku el a bisa: “Mi no ta bai sigui mas.” E momentu ei tabata despues ku el a kaba su Bachelor, i e no tabata sigur kua rumbo su arte lo tuma. Pa sigui su kaminda den arte, el a skibi un aplikashon pa su Master ku ta kombiná arte i maternidat. E Master a enfoká riba investigashon i ta pone atenshon riba temanan ku ta kompleho, kaminda arte i maternidat ta konektá. Den su lastu eksposishon di arte, ku ta yama “Bad Mom, Good Mom”, el a eksplorá historia di mamanan ku mester a hasi desishonnan difísil, inkluso mama ku a kometé aborto, i e tenshon di kombinashon di bida personal I arte. Otro mama nan ku a sigui pusha. Shardenia ta un muestra di esaki, demonstrando su kapasidat pa reflehá realidat den su obra.

E futuro i invitashon pa Kòrsou

Su soño ta pa sigui hasi mas eksposishon, i un di su meta grandi ta pa eventualmente bin biba Kòrsou bèk.

Shardenia ta invitá e pueblo di Kòrsou pa bishitá su eksposishon dia 29 di òktober, di 6:00 pa 8:00 di anochi na IBB den kura di Klínika Capriles. E idea ta pa e studiantenan di e skolnan por bini i disfrutá di e arte, i inspirá otro nan pa eksplorá nan kreatividat.