Baila, tene e mente bibu asta evitá demensia

Omayra Leeflang

Presidente Kurá di Arte

 

Na yüli próksimo Kurá di Arte ta kuminsá ku Line Dance esta move balia dirigí pa e siudadanonan di 60 aña bai ariba. Ta un método hopi konosí na Merka ku ta sòru no solamente di saka e hende grandi ku probablemente a baha ku penshun kana for di kas, pero tambe poné move. Move pa tene e spiritu bibu, e mente funshonando i asina evitá e proseso di enbehesimentu kana muchu lihé. Ku e kurso aki Kura di Arte ta kumpli ku un di su metanan esta kresementu duradero di e Orange Economy. Ademas arte ta un forma pa kontribuí na e felisidat di e ser humano. I sra. Omayra Leeflang ta presidente di Kurá di Arte. Despues di mas di 20 aña den polítika i promé ku esei tambe den enseñansa, awor di forma boluntario e ta duna su kontribushon na komunidat di Kòrsou.

 

Di polítika pa arte….

“Dos aña pasá ora ma disidí ku ta sufisiente i mi ta baha ku penshun, mi a bisa mesora ku mi ke hasi algu ku semper mi a gusta hasi ku ta arte. Ami ta toka kitara, mi a komponé rèp, den mi edukashon komo maestro di skol mi a hasi muzik komo tarea di eskoho i den mi hubentut, mi a baila 11 aña balèt i jazz ku Cesario Jean Luis ku a haña premio resientemente i mi a hasi drama teater ku Felix de Rooi i Norman de Palm den un obra teatral Mama Kòrsou i su yu sin trabou, arte semper a forma parti di mi bida pero e no tabata asina den publisidat. Mayoria hende konosé mi despues di 22 aña den polítika komo polítiko. Mi ta kontentu di a haña e oportunidat awor ku penshun pa dediká na dje”, sra. Leeflang a konta ku e mesun sonrisa ku semper e tin. El a keda aserká pa e presidente di e tempu ei Aña Steffens ku ta tambe e inisiadó di e proyekto Kura di Arte 5 aña pasá. A pidié pa yuda guia e proyekto di e fundashon Kurá di Arte i a pidié pa bira presidente. Sra. Leeflang ta konsiderá un oportunidat noble pa hasi algu riba otro tereno. Ta algu totalmente diferente esta Polítika i Arte.

 

Trabou boluntario….

Arte realmente ta diferente i liber. Sra. Leeflang a bisa ku tur funshon ku el a keda ofresé komo polítiko el a lag’é pa otro hende. El a skohe pa bai hasi algu ku no hopi hende lo hasi. Ounke ta presidente e ta, e no ta trabou pagá i ta trabou boluntario. Komo direktiva e por haña kompensashon pero nan a skohé for di momentu ku el a bira presidente ku e no ta tuma ni sèn pa gasolin. Nan ta duna nan kontribushon asina.

 

Mi a bai bèk na mi Roots, arte….

Esaki ta yena sra. Leeflang ku satisfakshon. El a bisa ku ta un bendishon hopi grandi ora Dios duna bu e grasia ku despues ku bo a traha komo un karera maestro di skol, despues polítika komo mishon, pa e drenta fase di penshun i awor por duna na komunidat na un forma boluntario. Esei ta algu grandi. E ta gradesido na Kòrsou, na Kurá di Arte i e ta gradesí Dios pa e bai bèk na su “roots” esta arte.

 

Arte riba esenario…

Kurá di Arte ta situá den kurason di Pietermaai. Den futuro nan lo tin un proyekto atraktivo pa turismo tambe. Pero tin un Trolly ku ta pasa einan i nan ta menshoná konstantemente “The palace òf the performing arts”. Kurá di Arte ta un fundashon lantá pa arte eseniko esta arte riba plataforma. E ta nifiká baile, teatro, muzik, kanto etc., etc. E arte ku bo ta riba esenario ta su meta. I e forma ku ta hasié ta unu spesífiko. Normalmente hende ta kere ta skol i bo ta bin inskribí aki, pero e no ta asina. Einan tin mas òf ménos 50 artista ku tin nan propio lèsnan ta duna einan. E ta úniko manera pa e keda eksistí. Hopi instituto di arte ta bai bankarota pasobra arte tin un preis. E no ta grátis i e ta kostoso. I si bo ta hasi arte eseniko ta pió ainda. Pa hasi baile mester tin sala di baile. I si bo ta dosente di baile, si bo tin 5 di nan, kada un mester tin un sala di baile i e no ta pagabel. Den Kurá di Arte tin 2 sala di baile, un chikí i un grandi i e dosente ta duna un kontribushon i pa e usa e sala i duna lès. E ta nifiká ku por tin 5 dosente ta usa e sala di un sala di baile. I loke ta importante tambe ta ku ora hasi baile na forma serio, un forma frekuente e flur mester ta di palu sino e rudianan ta sufri. Komo tal nan tin i nan tin un sala di gym grandi ku flur di palu trahá den tempu di frater. I tin un sala di baile chikí ku nan mes a traha ku a fura esaki ku palu. Tin espasio spesífiko pa di tal manera e artista por duna su lèsnan i na un preis faborabel.

 

Muzik baile i mas…

Banda di esaki tin muzik. Ariba tin sala di lès di muzik por ehèmpel drùm ta zonido duru pero einan tin espasio amplio pa hasié. Tin lès di piano, kanto tambe tin den sala grandi di baila kaminda por práktika arte di kabuya, un tipo di akrobasia. I tur esaki den un lugá i e fundashon ta manehá e lugá aki pa e artista no tin e gastunan, e no tin e responsabilidat di mantenshon pasobra e fundashon ta hasié ku e entradanan ku e ta haña. Tin un tim di maneho aki, un mènedjer operashon ku ta hasi e parti finansiero i atministrativo etc., etc, i un mènedjer kreativo ku ta un hóben. E ta sòru pa henter e moveshon artístiko ku tin den Kurá di Arte kana na manera ordená, organisá etc., etc. E ta traha oranan variá, anochi, den dia i komo e ta yòn e por hasié. Kurá di Arte ta un sentro ku ta brota di oportunidat pa arte keda praktiká i arte keda duná. Nan no ta un teater ounke sa usa Kurá di Arte pa un ke otro presentashon pero esei no ta nan promé responsabilidat ni promé tarea. Kurá di Arte ta habrí prinsipalmente pa hóbennan i p’esei ta haña ku mayoria di nan aktividatnan ta despues di 2 or.

 

Yena mainta pa nos grandinan….

Parti mainta ta un oportunidat pa un grupo ku sra. Leeflang tin hopi na kurason, nos grandinan. “Nos a bisa despues di 5 aña ku ta ora pa krese i atraé un grupo ku tin hopi tempu pa hasi sierto kosnan ku kisas ku den pasado nan tabatin ménos tempu i asina a kuminsá ku Line Dance, move balia”. Esaki ta baile pa hendenan for di 60 aña i parti mainta. Ta pa hendenan ku mayoria no ta traha i ku ta penshonado i ke sigui move. Moveshon despues di 60 ta sumamente importante. Ku moveshon tin investigashon ku ta mustra ku moveshon di baile por frena e embehesimentu di e selebre den sentido ku asta e ta bon den prevenshon di demensia. E por retrasá sierto aspektonan di embehesimentu den e selebre. E ta traha riba e ‘hypocampus’, e parti di e selebre importante. Investigashon ta proba ku baile ta hasié.

 

Move baila….

Moveshon por ta poko sai i e ta duna e sentimentu tin biaha ku ta traha bo ta traha. Ta bon pa un hende penshonado i riba 60 hasi algu leuk ku ta lag’é sinti felis i baile ta hasié. Tin diferente tipo di baile i nan lo no hasi bailenan ‘wild’ pero bailenan pa laga e hende grandi sinti ku e tei. E muzik ta laga bu sinti ku bo ta den muzik. Segun hende bira grandi nan ta hala atras di por ehèmpel fiesta. Pero si bai kòmbèk i mira kuantu hende grandi ta baila i gosa i awor por hasié den Kurá di Arte. Line Dance bo no mester ta flaku ni gordo, ta sapatu kómodo i smak mester tin. I no ta pone preshon riba e hende, ta algu kómodo.

E proyekto ta kuminsá na yüli i lo hasié den forma ku bo ta den grupo. I den grupo ta leuk pasobra bo ta konosé otro hende i e kontakto sosial. E sentimentu ku tur siman bo ta bèk i hasi algu leuk huntu ta yuda hasi e kurason kontentu. Un kurason kontentu ta importante pa hende sintié bon den bida.

 

Ta kuminsá na yüli….

Line Dance tin 2 dosente, un Ruth Croes i un hóben Malcolm Pieternella i ta kuminsá 8 di yüli. Un biaha mas un balansa entre un hóben i unu di mas edat i un hende hòmber i un hende muhé. E inskripshonnan ta kanando i ta kuminsá ku 2 klas. Tur kos ku kuminsá kuné mester krese. Ta intenshon pa den oranan di mainta hasi diferente aktividat pa hendenan ku no ta traha. Tin algun kurso tambe planiá. I arte ta relahante. Un hende no por imaginá nan mes kon arte ta laga bo eksperensiá un dimenshon di felisidat. E ta un harmonia ku bo mes i e kontentu ku bo ta ku bo mes i e den arte bo ta logra esei. I p’esei tin estudio ta bira ku arte den sierto sentido por ta asta mas importante ku lès di matemátika pa e harmonia di e hende. I p’esei den hopi terapia ta usa arte. I e preis ta 25 florin pa luna. Ku esei nan ta kere ku nan a habri Kurá di Arte pa un gremio mas.

 

SHARE

LEAVE A REPLY