WILLEMSTAD.-Manera EXTRA a informa anteriormente, e proseso di bakunamentu di hendenan a para awe mainta debí ku e Trahadónan a pone trabou abou despues ku atrobe nan pago no a yega.

EXTRA a bai buska informashon i a komprondé ku no tin kuestion ku no tin sèn pa paga, e sei tei pero ta e dokumentashon no ta a òrdu!

Buskando mas aleu EXTRA a haña splikashon detayá ku ta vários bia ta sosodé ku ministerio di GMN no ta atendé dokumentashon kompletu i korekto manera reglanan di gobièrnu ta indiká. Promé ku e ministerio di finansa hasi kualke pago, tur dokumentashon mester ta kuadra.

Den kaso di e sentro di bakunashon ta asina ku tur luna GMN mester manda ‘bestelbon’ kompañá pa fakturanan. Simplemente e dokumentashon ku GMN ta manda no ta kompletu! E luna aki falta faktura, pues mester pidi pa manda  faktura i asina e proseso ta tarda mas. Esaki ta pone ku tur luna tin mesun problema.

Minister di finansa brevemente a splika EXTRA ku no ta kuestion di falta di sèn. E sèn tei pa kumpli ku e pago.


Trahadónan a pone trabou abou pasobra no a kobra

Bakunashon na Poli a para

WILLEMSTAD.-Trabounan na sentro di bakunashon na Poli di Sint Elisabeth Hospital (Sehos) a para debí ku e Trahadónan na e sentro a disidí ku nan no ta sigui traha sin pago. Awe ta dia promé di desèmber i e Trahadónan no a haña pago ainda.

Miéntras ku gobièrnu i mayoria médiko ta pidi hendenan pa bai bakuna pa trata na yega bèk na e bida normal, awor ta resultá ku e proseso di bakunashon a para. Na Poli di Sehos tin basta hende ku a bai pa bakuná, pero a keda defroudá. Hendenan ta tende ku nan por keda warda un ratu pa wak si Trahadónan ta disidí na kuminsá tòg, pero te na e momentunan aki di mainta e Trahadónan no ta bakunando niun hende.

EXTRA tabata na e sitio i a komprondé ku esaki no ta promé bia ku e ta sosodé. Ta esei ta e motibu ku Trahadónan a disidí ku ta basta awor si. Por a tuma nota ku basta hende a akudí awe mainta na Poli pero no ta bakunando niun hende. EXTRA a trata na drenta den kontakto ku esnan responsabel pero te na e momentunan aki nos no a logra.

LAGA UN KOMENTARIO

Please enter your comment!
Please enter your name here