WILLEMSTAD.- Ayera djaweps den oranan di atardi, un hòmber limpiando su arma ta keda alkansá den kabes ku un bala.
Polis ta informá ku ayera djaweps 17 di aprel 2025 alrededor di 16.42’or, Sentral di Polis a dirigí un unidat polisial pa Kaya Adagio pa un kaso di tiramentu.
For di investigashon preliminar a sali na kla ku un hòmber, habitante di e kas, probablemente tabata limpiando su arma di kandela, na momentu ku un tiru a sali i alkans’é na su kabes.
Ambulans a yega na e sitio i transportá e víktima ku urgensia pa C.M.C. pa tratamentu médiko. Personal di reshèrshi táktiko i tékniko a yega na e sitio pa hasi e investigashonnan korespondiente.
E arma di kandela a keda konfiská pa mas investigashon.
update:
Djadumingu 20 di aprel 2025 polis a risibí informashon ku e hòmber víktima ku tabata enbolbí den e insidente na Kaya Adagio dia 18 di aprel 2025 a fayesé a konsekuensia di e herida ku el a sufri.
Esaki despues ku el a keda alkansá pa un tiru for di su propio arma di kandela.
Ta trata di e hòmber Beniamino Gerard Schotborg, nasé na Kòrsou dia 28 di òktober 1953.
