Enirahs Martina a studia den merkadeo, maneho di proyekto i maneho di kalidat na Puerto Rico. E ta un hóben atleta ku a representá Kòrsou dignamente. I awor e ke kompartí su konosementu ku otronan, ser un konsehero i mas tantu posibel duna un man.  I Enirahs ta atleta ku tambe e ta kompartí ku otronan ku e ta yudando.

Mi bida…

Enirahs ta kontentu su por kompartí su konosementu i asina aportá na nos dushi pais. Ora ta papia di proyekto ta kuminsá mara esaki na un trabou ku nos ta hasi so. Sin sa ku e proyekto mas importante di kada persona ta su mes. I hopi bes hende ta bon den atendé ku proyektonan di trabou pero ta laga nos mes na kaya. Ke tal hasi nos e proyekto mas importante pa nos biba un bon bida. Loke nos tin di hasi ta planifiká nos bida. Hasi un planifikashon, komuniká ku otro kiko ta e kosnan ku por mehorá, kon importante ta mihó pa mi mes i esnan rondó. Kiko ta e kosnan ku tin di tene kuenta kuné. Kiko tin di traha riba dje. Kon por dia pa dia strukturá mi mes, mi bida pa e proyekto ku ami ta, ku tin komienso i final pa ora ami yega na e final ei mi ta satisfecho di a biba un bon bida. Ku mi a hasi ku ta e propósito di mi bida. Nos tur tin di bai den nos mes pa nos por yega na e resultado ei.

Planifiká…

Mester kuminsá planifiká bida for di na yòn, segun Enirahs. Mas yòn kuminsá mas bon e ta bai. Mas ku un direkshon bo ta hiba bo bida. E regla di 20/80 ta ku e 80% di bo resultado ta 20% di loke bo a hasi. I si kuminsá lat, mas lat lo bo kosechá. Ke tal e hóben ei hink’é den for di den enseñansa  ku e planifiká su bida, wak su bida komo proyekto di tur e metanan ku e ke alkansá i trata riba dje. Esei lo sòru pa den futuro den profeshonalnan ku ta traha muchu mas motivá, i ku mas pashon. E no ta bai traha djis pa gana un salario pero ta traha den loke bo ta gusta. I for di edat hóben tin di kultivá esei. I planifikashon no ta nifiká e bida personal so. Pero ta hopi faseta tin di hinka den dje. Enirahs a konta Djasabra ku e parti personal kaminda e persona ta traha riba su mes kon e ta, unda e ke bai, kiko ta e ambishonnan, kiko ta e ophetivonan, ki vishon tin i unda ta mira bo mes. I kiko ta e tareanan ku ta hasi tur dia ku ta pone bu yega mas serka di bo meta. I tin e planifikashon profeshonal tambe kon bo mes ta proyekto bo mes. I tin e planifikashon stratégiko empresarial, kaminda si e persona ta planifiká su bida na manera strukturá i bon, ora e yega na un empresa ku tin su propio struktura. Nan dos lo komplementá otro mas mihó i por ripará asina kon ta apliká e forma ku ta biba pafó di trabou, den trabou mes i haña e resultadonan eksitoso.

Pone meta…

Pa kontrolá ku e planifikashon ta kanando manera mester ta, Enirahs a bisa ku tin di establesé meta. Tin meta di korto plaso i meta mediano i largo plaso. Ta bon pa bisa ku ta bon pa kada persona hasi análisis di kiko ta su fortalesa, kiko ta e oportunidatnan, kiko ta e debilidatnan i e menasanan. No ta pasobra ta empresa so mester hasi análisis, pero kada ken mester hasi análisis di su mes i e por mira ku loke e tabatin den debilidat, kisas na yanüari, a traha riba dje ku awor e ta fortalesa. I e loke tabata menasá tambe a drecha. I ta bin debilidatnan i menasanan nobo pero ta ‘chekmark’ kiko a logra i einan por mira pa kada ken ku ta bai dilanti i ku ta hasiendo esfuerso. Ta trahando proaktivo pa mehorá bo mes.

 

Kontagiá otro ku positivismo…

Teniendo na kuenta e pandemia ku Kòrsou ta pasando aden, ku a sòru pa un krísis ku hopi hende asta a pèrdè trabou i ta bibando den strès i depreshon, Enirahs ku su konosementu a trese e siguiente mensahe pa nan; mi ta duna mi mes eksperensia. Pa ku e pandemia aki mi ta na kas i mi a tuma e desishon pa mi mes ku mi no ta traha i no tin entrada pero a disidí ku no ta keda riba kama. Mi ta lanta mainta, hasi ehersisio, prepará un desayuno pa mi i mi mayornan, mi ta buska algu di lesa, mi ta bai riba kòmpiuter, mi ta wak televishon, wak notisia, wak mi bestianan, bai den kurá i atendé ku palunan di fruta. Tur dia mi ta baha un app i wak ki reseta kushiná, kiko dushi pa traha. Mi ta hasi mi dia un tiki interesante. I pa bo kita e mente for di e krísis, for di e temporada difísil. Kada kas ta diferente, kada situashon ta diferente pero e motivashon den bo, e gana den bo pa lucha i bai dilanti, esei ta pone bo dal e paso. Kon bo ke, pa esun den kas ku ta den e mesun situashon ku mi i ta kontagiá ku mi legria. Ami ta move, mama ta move i tata ta move. Mi ta kontagiá nan i nos tur ta move. I huntu nos ta pasa den e periodo di prueba aki. Ta un temporada difísil ku nos tin di siña konosé nos mes, siña habilidatnan duki pa nan lanta bèk. I tin dia segun Enirahs e tampoko tin gana di lanta, tin dia e no ke mira kushina i tin dia difísil pero pa e dianan ei tambe bo tin di buska forsa pa lanta i keda trankil. Nos no por pasa e guera aki nos so.

 

Balorá…

Aktualmente Enirahs tin un página di Facebook ku tiki tiki e ke hinka den akshon kaminda di forma digital i a base di video i ‘quots’ nan e ke lanta hóbennan, lanta komunidat pa move i hasi algu. E ta kere masha hopi den yuda otro, sirbi otro pasobra ora hasié bo ta lubidá den loke bo mes ta pasando i ora mira e impakto ku tin den bida di e otro outomátikamente bo bida tambe ta drecha. Esei ta motibu pa sigui. Enirahs a bisa ku e ta dispuesto na duna di su konosementu pa yuda den diferente área na Kòrsou pasobra no ta tur kos ta bal sèn. Tin kos ku e satisfakshon di e hende, ora djis mira smile ta bal muchu mas ku e sèn. Enirahs ta kere hopi bia ora hóbennan bin bèk i bin ku yen título no ta fásil pa haña un trabou kaminda e doño di trabou ta rekta hende ku e tin di paga kisas hopi, pero no ta nesesariamente esei, pero e ganashi ku tin ku e hende ei por hasi pa un empresa, pa huntu logra yega na e meta. No mester wak e trahadó komo un number pero komo un ‘asset’. E ta importantísimo pa huntu yega komo empresa na e meta. Mester stòp di mira trahadónan komo un number pero mira nan komo un persona di hopi balor ku e konosementu den su área pa asina huntu por yega. Balorá i motivá e trahadó pa e por duna e resultado deseá.

 

Maneho di kalidat…

I pa loke ta maneho di kalidat, Enirahs a bisa ku esei ta su beibi. Ta tur kos ta kalidat, e manera ku bo ta papia, e manera ku bo ta bisti, e manera ku ta pensa, tur loke hasi hasié ku un mentalidat di kalidat. “Bo ke pa nan trata bu di kalidat ke men dun’é bèk”. Promové un bida di kalidat. Enirahs a kompartí algun tep kon pa hiba un bida di kalidat;

-Stima bo mes

-Stima ser supremo

-Smile ku bo mes

-Promové optimismo den bo bida

-Move

-Kome bon

-Bebe bon awa, un tripa limpi ta un bida di kalidat. Loke bo kome ta keda den bo tripa i enfermedatnan ta sali for di bo tripa. Antes nos mayornan tabata duna nos den fakansi prugashi esei pa limpia nos sistema. Grandinan tabata sa dikon mester tin tripa limpi pa bida mas saludabel

-Rondoná bo mes ku hende positivo

-Kita tur kos ku ta karga bu toksiko. E ta importante pa bo mente.

-Trein bo mente, lana mainta i hasi algun pregunta; kiko ke logra, kon ke logr’é, kiko mester hasi, ken mi ta bai kompartí, kiko ta mi metanan awe. I ora anochi sera bolbe hasi outo analisá pa sa kon a bai e dia. Si hasi esaki tur dia, bo ta trein bo mente pa ta un persona mas pro aktivo, muchu mas aktivo, mas positivo i ta pone ku por kontagiá otronan mas lihé ku akshonnan. Papia bunita ta fásil, pero kiko e akshonnan mes ta.


Training…

Tur esaki ta un training ku tin di pone den práktika. Tin diferente término ora ta papia di kalidat na nivel profeshonal. Kalidat ta un produkto òf servisio liber di defisiensia. E ta kasi sin fout i tin diferente hèrmènt i téknikanan pa por yega na esei. Sin fout. Ta mihó ku bo kompetensia. Kiko ta hasi ku ta mihó ku e kompetensia. Kiko ta e karakterístikanan ku ta pone e kos ku ta ofresé ei surpasá espektativa di e kliente òf di e persona ku bo ta dil kuné. Hopi bia hende ta mara kalidat na sèn, pero pa tin estilo di bida di kalidat ta esfuersonan ku no mester di sèn pa hasi nan.

 

Maneho di kalidat den trabou tambe. Enirahs a menshoná e S nan. Ta un téknika hapones pa den área di trabou eliminá desperdisio. Imaginá ku a yega na un kas di karpinté i tur hèrmènt ta plama. Of den baño tur kos ta plama, bo tin di struktura esei e 5 S nan;

Sort; esta ta saka afó tur kos ku no  mester di baño

Sett; ordená

Shine; limpi

Standardize; pa e tres pasonan ku a usa ta hasi algu figo pa tur hende sa ku esaki ta e standart ku ta bai usa

Sustain; sostené loke  a kuminsá kuné. Tin bia nos no ta sostené loke nos kuminsá i despues di 1 siman tur kos ta brua bek. Apliká e 5 S den tur kos, den kushina, den área di trabou kon ta pone tur kos. Ta un téknika di kalidat i asina tin vários téknika mas ku por usa.

 

Duna bèk na hóbennan…

I banda di tur esaki Enirahs ta un atleta. El a studia na Puerto Rico kaminda el a bai ku scholarship. Awor aki den deporte tambe e ta duna bèk. E ta ta trein nos hóbennan. E ta coach den Trupial, ku ta e tim ku el a lanta den dje tambe i ku a dun’é asina tantu oportunidat pa e por a biaha bai hopi kaminda pa kompetí i konosé hopi parti di mundu. I esei ta algu ku ora el a bin bèk e ta duna bèk, laga e mucha i e atleta ku ta lantando tin mihó oportunidat den Karibe òf na Hulanda, unda ku e studiante ke bai siña, ku e por praktiká e deporte ku e ta gusta.

 

Enirahs tin su empresa ERM Quality Services ku ta kla pa duna konseho i yuda kaminda e por. Tur su klientenan e ta yuda ku kalidat. E ta hóben i e sa ku e tin hopi di siña i ta habrí pa siña., habrí pa korekshon semper. I e ta alkansabel na 523-4585

LAGA UN KOMENTARIO

Please enter your comment!
Please enter your name here