WILLEMSTAD.- Djadumingu promé di mart 2020 Curaçao International Film Festival Rotterdam ta laga bo pruf un tiki asina di e programa di festival, ku presentashon di e pelíkula italiano ‘Rosa Pietra Stella’ di Marcello Sannino.
Danki Dios sine italiano ta presentá nos algun pelíkula bunita, di aktualidat, neo realístiko. E fikshon bibu aki, debut di e regisor di dokumental Marcello Sannino ta tuma lugá den Portici, e parti bieu multikultural di Napoli kaminda Sannino mes a krese den un komunidat, kaminda korupshon ta al órden di dia.
Ku un bista skèrpi pa detayenan lokal i ku un elenko artístiko tremendo e ta konta un historia nuansá i ku hopi empatia. E figura prinsipal ta Carmela di 30 aña di edat (e título di e pelíkula ta referí na un frase for di e piesa ku tin mesun título: ‘You rose, rock, star’), ku ta hiba un bida ku masha engaño i intriga, dor di hasi algun trabou sushi. Carmela su situashon ta empeorá, ora e ta sera un dil ku un abogado, pa duna visa na inmigrantenan ilegal, loke ta resultá ku nan ta sak’é, huntu ku su mama i su yu Maria di 11 aña for di kas. Tarek, un algerino ku tin basta tempu kaba bibá den Algeria ta hunga un ròl importante den bida di Carmela. Pa Tarek no ta eksistí ningun diferensia entre Algeria i Italia.

Rosa Pietra Stella (italiano/ku suptítulo ingles) ta pasa djadumingu promé di mart 2020. Karchi ta optenibel for di awe na kaha na The Movies Otrobanda.
E di 9 edishon di Curaçao International Film Festival Rotterdam ta di djamars 21 te djadumingu 26 di aprel 2020 na The Movies Otrobanda.

LAGA UN KOMENTARIO

Please enter your comment!
Please enter your name here