WILLEMSTAD.- E asosiashon di bankonan na Kòrsou, Curaçao Bankers Asociation (CBA) a hala e desishon pa eliminá chèk komo medio di pago aden, despues di intervenshon di FTAC.
Bankonan asosiá na CBA ta ofresé diferente métodonan di pago entre otro e chèk di pago. Den un reunion di CBA ku a tuma lugá dia 14 di novèmber 2017, bankonan a tuma e desishon di eliminá e chèk i pa esaki a instalá un grupo di trabou. E desishon aki wòrdu registrá den un Memorandum of Understanding. CBA a informá FTAC di e desishon aki riba 19 di aprel 2018.
FTAC a kuminsá un investigashon i a yega na e konklushon ku e desishon di CBA di eliminá chèk for di merkado ta kontra di reglanan di kompetensia. Despues di un kombersashon ku FTAC, CBA a disidí di kanselá e desishon. FTAC a disidí di terminá e kaso di un manera informal i un otro medida manera ‘un but’ no ta nesesario. FTAC lo sigui kontrolá e kombenio i por tuma medidanan manera ‘un but’ si CBA no tene su mes na e palabrashon.
FTAC ta supervisá e reglanan di e lei di kompetensia hustu ku ta na vigor for di sèptèmber 2017, spesialmente e prohibishon di kartel òf mal uso di poder. Prohibishon di kartel ta enserá ku negoshinan ku ta kompetí ku otro no tin mag di hasi palabrashonnan tokante di preis i asosiashonnan di empresarionan no tin mag di tuma desishonnan pa mantené preisnan kolektivo. E palabrashonnan aki ta kondusí na preisnan haltu pa e konsumidó.
Bo por haña e desishon di FTAC riba nan wèpsait www.ftac.cw.
Siñalnan tokante di violashon di lei di kompetensia, por wòrdu mandá na [email protected] òf por pasa na kantor di FTAC na Pietermaai 6.
