BARCELONA, AP.- Polis katalan regional a registrá un oumento fuerte di robo ku violensia òf intimidashon na Barcelona, un di e destinashonnan turístiko di verano mas popular den Europa.
Atrako riba kaya ku menasa di violensia a oumentá ku 30% te ainda, kompará ku e mesun periodo na aña 2018. E siudat Mediteráneo aki ta atraé kasi 16 mion turista anualmente, segun indikashon di polis di Catalonia.
Algun di e víktimanan di e atakenan ta funshonarionan estranhero. Un embahador di Afganistan na Spaña a wòrdu atraká riba kaya i un agente di FBI ku fakansi tambe a wòrdu atraká kaminda e malechornan a bai ku su oloshi den sentro di Barcelona. Un funshonario di Surkorea a muri den yüni, debí na e heridanan ku el a sufri despues ku un ladron a purba hòrta su tas.
E direktor di polis, Andreu Martinez, bisa djárason ku ainda polis ta trahando pa para e ola di krímen ku a generá hopi preokupashon relashoná ku seguridat na Spaña.
Mayoria di e atrakonan aki ta inkluí robo agresivo di hoya, oloshi i tas. Barcelona ta wòrdu konsiderá komo un di e siudatnan mas safe, ku eksepshon di atrakadornan ku ta hòrta un gran kantidat di estranhero durante temporada di verano.
