ORANJESTAD -E barku krusero Norwegian Pearl a sali for di PortMiami djaluna pa edicion 2026 di e Crucero Grandi cu e tema ‘Bare Necessities’, osea cu tema di nudista. Segun e website di compania, e crucero charter aki lo bishita destinacionnan den Caribe Sur y Bahamas. E Haf cu lo wordo bishita ta inclui Ocho Rios na Jamaica, tambe Oranjestad na Aruba, Willemstad na Corsou y Kralendijk na Boneiro.
Promer cu e barco bolbe Miami, Norwegian Pearl tambe tin plan pa haci dos bishita na Great Stirrup Cay, unda invitadonan lo por practica nudismo. “Ta un experencia maravilloso pa relax riba santo blanco bou palmanan cu ta move suavi, bisti solamente cu un sonrisa,” Bare Necessities a indica riba su website.
Politica di operador ta bisa cu, mientras ta riba bordo, cu algun excepcion, invitadonan por scoge pa bisti paña of no na cualkier momento. Bisti paña ta obligatorio solamente ora barco ta den haf of durante recepcion di capitan y presentacion oficial. Mientras restaurante self-service ta opcional tocante paña, invitadonan mester bisti paña semper ora nan ta den comedor principal y restaurante special. Operador tambe ta pidi invitadonan pa sinta semper riba un serbete ora nan ta sunu, sea cu un G-string, thong of ora nan ta completamente sin paña. Serbete chikito lo wordo coloca rond di barco pafor di area comun.
Segun e website di Bare Necessities, compania ta ofrece cruceronan “clothing-optional” pa mas cu 35 aña. “Nos experencia ta cu hende cu por laga su paña atras den un ambiente social, ta mas capaz pa ta nan mes, en bes di kico nan pensa otro kier nan ta,” Bare Necessities a indica. “Nos pasaheronan tin hopi razon y experencia diferente cu ta haci nan scoge vacacion desnudo riba opcionnan tradicional di biahe.”(NoticiaCla)
