WHITEHOUSE, JAMAICA, AFP.- Barionan na wèst di Jamaica tabata den un situashon desesperá djadumingu, algun dia despues ku orkan Melissa a pasa. E orkan a laga pueblonan destruí i por lo ménos 28 persona morto riba e isla.
Melissa a bira e tormenta di mas intenso ku a pasa riba Jamaica den 90 aña. E orkan di kategoria 5 tabatin bientu fuerte di 300 kilometer pa ora.
E orkan a asotá vários isla den Karibe, lagando por lo ménos 31 morto na Haiti, inkluyendo 10 mucha ku a hoga. Algun parti di Cuba i República Dominicana tambe a keda afektá.
Mayoria bario a keda aislá. Un kantidat di kas, hospital, negoshi i otro edifisionan a sufri dañonan grave òf a resultá kompletamente destruí.
E pèrdidanan ekonómiko lo ta un “peso” pa Jamaica i sobra parti di e region pa vários aña largu, asina un funshonario haltu di Nashonnan Uní a bisa djadumingu na Panamá.
Nahuel Arenas, di Nashonnan Uní a bisa ku e dañonan di orkan Melissa por ta mesun tantu ku loke Jamaica ta generá den un aña. Segun Banko Mundial, Jamaica a generá kasi 20 mil mion dòler den 2024, pues esaki ta loke e pais por pèrdè pa motibu di e orkan.
Nashonnan Uní a asigná 4 mion dòler di su Fondo Sentral pa Respuesta di Emergensia pa yuda amplia e operashonnan humanitario na Jamaica.
