Trahadónan riba un ‘tugboat’ guiando e barku Anatoly Kolodkin na momentu ku e tabata drentando haf di Matanzas na Cuba
MATANZAS, CUBA.- Un barku di petroli ruso a mara na un haf na Cuba djamars pa entregá e promé karga di krudo. E isla ta afektá pa un krísis for di yanüari, despues ku Washington a kita e blokeo di kombustibel.
E barku Anatoly Kolodkin, un barku bou di sanshon di Merka, a drenta haf di Matanzas, na ost di Cuba den oranan di mainta. Despues di un biahe di tres siman for di Rusia e barku a trese 730.000 barí di krudo.
E desishon di presidente merikano Donald Trump, pa permití e entrega ta evitá un konfrontashon ku Moscow. Ademas, esaki lo sòru pa un alivio temporal pa e pais ku a sufri vários blackout, skarsedat di kombustibel i redukshon di transporte públiko.
“E entrega aki ta krusial pa nos sobreviví paso e pais ta kompletamente paralisá”, segun indikashon di un guardia di seguridat di 76 aña.
Sin embargo, analistanan a señalá ku e entrega lo duna Cuba un alivio temporal. “E karga no ta yuda resolvé e magnitut di e défisit ku e pais ta enfrentá”.
Lo refiná e krudo ruso pa produsí gasolin pa transporte manera diesel i fueloil pa generatornan eléktriko. Analistanan a bisa ku por dura tres siman pa refiná i distribuí esaki.
