Manifestantenan na fabor di e studiante Mahmoud Kahlik ta demostrá nan sosten na e studiante i kontra di deportashon djis pa motibu ku el a tuma parti na protesta pro palestina.
NEWARK, USA (AFP).- Abogadonan di gobièrnu norteamerikano a preshoná pa e kaso di Mahmoud Khalil, un lider di protestanan pro palestino di Columbia University detené ku intenshon di su deportashon, keda trasladá pa un tribunal ku mas ta simpatisá ku e polítika anti-inmigrashon di Donald Trump.
Khalil a keda detené na New York, kaminda e ta biba, i trasladá pa Louisana (zuit) na kuminsamentu di mart. For di e momento ei a start un guera hudisial i e inisio di un seri di detenshon i revokashon di visa di otro studiantenan ku a tuma parti den e protestanan pa denunsiá e guera di Israel den Gaza.
Gobièrnu no a akusá Khalil di a falta ku ningun lei, sino ku a ordená su ekspulshon i kanselashon di su residensia permanente pa konsiderá ku e ta kontra dje polítika eksterior norteamerikano.
Den tribunal di New Jersey ayera, e abogado Baher Azmyu a akusá gobièrnu di ‘adoptá un argumento ku ta zona komo represaya”.
Di su parti e abogado di gobièrnu August Flentje a defendé ku “e kaso ta pertenesé na Louisana”, kaminda e ta detené pa su deportashon. Segun defensor di derechinan humano, e tratamentu dje kaso na Louisana ta mas na fabor di e polítika anti imigratorio di Trump. E hues ainda mester tuma un desishon.
Khalil no tabata presente pa e kaso, pero su kasá Noor, ku ta na estado di promé yu dje pareha, a asistí ku vários simpatisante.
.
