WASHINGTON (AFP).- Presidente norteamerikano Donald Trump a anunsiá ku paisnan ku kumpra petroli i gas venezolano lo paga un belasting di 25% kuminsando dia 2 di aprel riba tur transakshon komersial ku Merka.
E “belasting sekundario” lo keda apliká “pa rasonnan diferente”, segun e magnate republikano den un mensahe riba su plataforma Truth Social.
“Venezuela a manda pa Merka, di forma intenshonal i engañoso, desena di míles di delinkuente di alto rango i di otro tiponan, hopi di nan ku ta asesino i personanan di naturalesa hopi violento”, segun e presidente merikano.
El a menshoná komo ehèmpel e gèng “Tren de Aragua”, ku el a pone e stèmpel di ta un organisashon terorista.
“Nos ta den proseso pa manda nan bèk”, segun Trump, kende su gobièrnu a atvertí e mandatario venezolano Nicolas Maduro pa repatriá nan den situashon iregular for di Merka si e ke evitá “sanshonnan pisá”.
“Venezuela ta hopi hostil pa ku Merka i e libertatnan ku nos ta defendé”, segun Trump den su mensahe. “Pa e motibu ei, kualke pais ku kumpra petroli òf gas di Venezuela lo ta obligá pa paga 25% di belasting pa kualke negoshi ku hasi ku nos pais”, segun el a atvertí.
