BRUSELAS BELGIKA, AFP.- Bèlgika a ninga di habri su frontera pa biaheronan di 15 pais den eksterior di Union Europeo, kual ya a haña outorisashon pa biaha den Europa. E desishon a wòrdu adoptá despues di evaluá e riesgonan di salú.
“E biaheronan di e paisnan aki no por drenta Bèlgika ainda. Pa e belganan, ainda nan no por biaha pa e paisnan aki tampoko”, asina un bosero di Eksterior a bisa.
Bèlgika a indiká ku si habri frontera pa Tailandia, Serbia, Argelia, Maroko, Tunesia, Ruanda, Georgia i Montenegro, esaki ta forma un riesgo di salú pa e pais. Pa loke ta e otro paisnan, Bèlgika a bisa ku e turistanan belga ainda no a haña outorisashon pa biaha pa e paisnan aki.
E 27 paisnan di UE, inkluyendo kuater di e espasio Schengen (Suisa, Liechtenstein, Islandia, Noruega), a disidí pa habri frontera pa 15 pais mas siman pasá. Pero e akuerdo ta un “rekomendashon” ku kada pais por disidí si lo adoptá den su totalidat.
Por ehèmpel Spaña a habri frontera pa 12 di 15 pais akordá den UE, pero no pa Argelia, Maroko i China te ora e paisnan aki tambe duna outorisashon pa Spaña su siudadanonan drenta.
