BELGIKA.- Gobièrnu di Bèlgika ayera a anunsiá e pakete di yudansa di mas grandi ku el a yega di duna, den e kaso aki na Ukrania, kual ta inkluí $97.5 mion na ayudo militar. Ayera konseho di minister a disidí di agregá un pakete nobo di 90 mion euro ($97.5 mion) na yudansa militar. Esaki ta e pakete di ayudo di mas grandi ku Ukrania ta haña te awor for di kualke pais. Asina Promé Minister di Bèlgika, Alexander de Croo, a deklará na periodistanan. E pakete nobo aki ta bini riba e 146 mion euro ($158 mion) ku Bèlgika a duna kaba na asistensia militar.
Pero e asistensia militar aki ta parti di un pakete mas grandi ku ta kontené tambe asistensia humanitario i sivil. E asistensia militar lo inkluí misilnan anti avion, misilnan anti tankero, granada i munishon, i esaki lo duna Ukrania e posibilidat pa sigui protehá su pueblo. Tambe Bèlgika lo duna vehíkulonan militar, trùk, tanki i otro vehíkulonan blindá.
