BRUSELAS, BELGIKA, AFP.- E promé minister di Bèlgika Alexander de Croo a bisa djabièrnè ku lo permití tur tienda pa habri riba 1e di desèmber, pero e semi-lockdown ta keda vigente pa sigui baha e infekshonnan di Coronavirus.
“E situashon den nos pais ta drechando, pero ta importante pa nos mantené e situashon bou di kontròl”, asina De Croo a bisa atvirtiendo ku Pasku i Aña Nobo “lo ta otro e aña aki”. Te ainda solamente supermerkadonan tin pèrmit pa keda habrí.
Fransia a plania pa suavisá su medidanan i laga tiendanan habri bèk for di awe.
E promé minister a bisa ku lo no tin vürwèrk riba Aña Nobo. El a avisá tur hende pa no biaha den eksterior i a agregá ku outoridat lo kuminsá kontrolá na frontera. Ademas, esnan ku yega Bèlgika for di paisnan ku infekshon haltu di COVID mester drenta den karentena.
Bèlgika a reportá 570.000 kaso di infekshon te ainda, ku un promedio di 2.756 kaso diario registrá siman pasa. Outoridat kier baha esaki na 500 pa dia pa fin di aña.