WILLEMSTAD.- Ya ta basta ratu ku tin keho di personanan ku ta bishitá sitionan di dibertishon na Janthiel i Bapor Kibrá i ta haña nan konfrontá ku individuonan ku ta ofresé nan droga pero tambe uso di droga ku ta tumando lugá na un forma habrí. Ta trata di sentronan di dibertishon ku ta hala hopi hende i en partikular ta hala hóbennan. Polis tambe tin konosementu di esaki i tin atenshon pe.

Polis ta informá ku djabièrnè dia 30 di yüli 2021, polis a sali dirigí pa aktua kontra benta i uso di droga na sitionan di dibertishon, prinsipalmente den área di Janthiel i Bapor Kibrá.

Ya pa basta tempu kaba tin hopi uso di droga na establesimentunan di Horeca den e áreanan aki i benta di droga na e sitionan ei a bira algu normal.

Un tim di polis a sali pa atendé ku e situashon aki i tabatin éksito den su operashon tambe, ya ku a logra di pone man riba un trio bendedó di droga ku a keda detené.

Den poder di e sospechosonan a topa un kantidat di droga ku a keda konfiská.

Polis ta atvertí ku lo kontinuá ku e akshonnan aki den próksimo lunanan i lo sigui ekspandé pa otro áreanan tambe, kaminda ta konosí ku tin uso i negoshi di droga ta tumando lugá na momentu ku e establesimentunan di dibertishon ta operashonal.

LAGA UN KOMENTARIO

Please enter your comment!
Please enter your name here