‘Presidente pa hinter Parlamento i no pa koalishon i gobièrnu so”

DEN HAAG.- Tweede Kamer a eligí un presidente nobo awe den persona di Vera Bergkamp (D66). Di e forma aki Parlamento ulandes ta bolbe skohe un hende muhé komo presidente. Bergkamp ta sigui Khadija Arib (PvdA) ku a fungi komo presidente for di 2016.

Den e promé buèlta kaba Bergkamp a logra haña 74 di e 139 votonan bálido ku a keda emití. E dos otro kandidatonan ku tambe a postulá komo presidente tabata Martin Bosma (PVV) i Khadija Arib. Nan a haña respektivamente 27 i 38 voto.

Mas tempran promé ku e elekshon, Vera Bergkamp a bisa periodistanan ku el a sali kas ku positivismo i for di e momentu ei el a pensa ku si e puesto ta pe e lo hañ’e i si esei no ta e kaso e ta sigui hasi su trabou normal. Bergkamp ta miembro di Tweede Kamer for di 2012. Ta bon pa indiká ku Bergkamp konosé e funshon komo presidente di Tweede Kamer bon ya ku e tabata vise presidente  i komo tal e tabata esun ku ta remplasá Arib na momentu ku esaki ta ousente. Tambe e tabata forma parti di e maneho diario di e presidio di Tweede Kamer. Vera Bergkamp den pasado tabata direktor di Sociale Verzekeringbank, tambe e tabata duna guia na e organisashon di homoseksualnan.

Promé ku e elekshon, Tweede Kamer a puntra e tres kandidatonan pa presidente kon nan ta kere ku por mehora e relashon entre Parlamento i gobièrnu. Algu ku vários miembro a trese dilanti ta ku e presidente di Parlamento mester ta un persona ku ta para riba partidonan i duna direkshon i no keda mira su mes komo miembro di gobièrnu òf miembro di koalishon. Presidente di Parlamento mester sirbi hinter e Parlamento i no koalishon òf gobièrnu so.

Di otro banda e frakshon di PVV a atvertí pa e elekshon di Bergkamp no resultá den un akuerdo delantá entre D66 su lider Sigrid Kaag i e lider di VVD Mark Rutte. Tin indikashon ku Rutte i Kaag a papia òf a hasi palabrashon ku otro relashoná ku presidensia di Tweede Kamer.

 

LAGA UN KOMENTARIO

Please enter your comment!
Please enter your name here