…Mosa Nena tabata na Kòrsou, kaminda el a kuminsá sondia e tereno pa e sertámen di beyesa di damas nan kurvá, e damanan balente. The Curves Academy ta loke Mosa Nena a kuminsá kuné komo akademia pa e damanan ku kurpa komo modelo. Despues di un sondeo online, a haña 6 embahador i a sigui e promé shoot pa Curves Academy.

Simbolisá e kurvá bunita

Mosa Nena ta un dama ku ta simbolisá e beyesa di un hende yen.  Den entrevista anterior ku nos el a pone énfasis kon dia e tabata chikí el a keda tentá pasobra e ta gordo. Pero awor ku el a krese el a siña aseptá su mes manera e ta, I el a gana na kuminsamentu di e aña aki e kompetensia di beyesa di damanan kurvá. I ta den e kuadro aki el a lanta tambe The Curves Academy kaminda den nan promé presentashon a pone énfasis riba e ‘Body Positivity’, konfiansa propio i ta un plataforma pa hendenan curvy, plus sais pa damanan bira mas sigur di nan mes. Tambe si e persona ke kuminsá un karera komo modelo, e akademia aki ta duna un man den e kuadro ei.

Damanan interesá

Mosa Nena a konta EXTRA ku relashoná ku e sertámen ku el a gana ku ta e Top òf Model Plus Size, el a bira tambe su direktor nashonal. Awor e por buska damanan ku ta interesá pa partisipá den e sertámen di Hulanda i Kòrsou. Esei tambe ta algu manera el a splika nos e ta beisig kuné.


Stima bo mes

“Mi ta haña ku bunitesa ta bin di paden sali bai pafó. Esei pa ami ta e kos di mas importante. Bo por hasi tur kos di pafó pero si paden bo no ta sinti bu bo no ta asina. I esei nos ke hasi yuda hende stima nan mes i dimes miéntras tantu nan ta stima nan mes i konfiansa propio bo por traha riba e sobra. Si bo disidí si bo ke baha di peso, bo por gym, kome salu i workout o baha. Pero focus no ta riba esei, Dios a traha nos manera nos ta i nos tin di stima nos mes i esei ta e kos di mas importante. Ta algu ku mi a stuggle kuné i mi ke yuda otronan kuné sigur sigur”, segun Mosa Nena su mes palabranan.

 

Konfiansa propio

Hopi bia ta haña ku e dama plus sais den mayoria kaso e konfiansa propio ta ménos. Esei segun Mosa Nena hopi bia tin di aber ku  e standart di beyesa den mundu aki. E standart di beyesa tabata saisnan 32, 34. Si wak modelonan ta esei nan ta eksihí. Tambe mester tin haltura di tal i asina bo ta konta komo modelo. Pero den nan kaso nan ta mira ku esei a kambia. Hopi kompania ta promové diversidat i esei nan tambe ke mustra, esta ku no ta un standart di beyesa tin. “Ta nos mes ta disidí nos standart di beyesa i nos no ta bisa ku e hende mester ta kurvá pa e ta bunita pero nos ta bisa ku si bo ta esei bo mester sinti bu bon. No kompará bo mes ku otro hende”, segun Mosa Nena.

 

Ser gordo no ta nifiká no ta salú i ser flaku no ta nifiká salú

Pa loke ta e parti di salú Mosa Nena a bisa ku un hende yen por ta salú. Pero tambe mester wak pa bo mes kon bo ta sinti bu. No ta pasobra bo ta kurvá ta nifiká bo no ta salú i no ta pasobra abo ta delegá bo ta salú. E ta diferente i kada persona ta diferente. E hende mester sa kon e ta sintié. Si esun ku peso ta sinti ku e ta bira malu di esei i sobr’e peso no ta salú, no ta nifiká si ku ora bo ta  mas yen bo no ta salú. “Nos yunan di Kòrsou por lo general tin e kurvanan. Nos a wòrdu bendishoná ku e kurvanan. Esei semper mi ta bisa. Nos tipo di bòdi ta otro”.

No tur kos bo por bisti

Un hende plus sais por bisti tur kos? Riba e pregunta aki Mosa Nena a bisa no por bisa tur kos. I esei ta algu ku nan ta bisa i enfatisá riba dje den Curves Academy. Nan ta purba enfatisá i siña e hende ku a base di e forma i kon e ta presentá su mes e ta bisti. Na momentu ku bo ta bai presentá bo mes, bo tin di wak pa bo paña ta adaptá na e presentashon pa asina por risibí loke bo a bai buska. Si bo ta bisti un sais S kaminda e sais mester ta XL por imaginá kon esei lo keda. E ta bisa hende ku kurva por bisti bunita i sèksi i kon ku nan ke pero purba siña kiko ta pas ku bo tipo di bòdi i kiko ta pas ku e okashon. Hende delegá ta meskos, bo por ta delegá pero no ta tur kos ta pa tur okashon i no ta tur paña ta kuadra ku e kurpa. I esei ta netamente loke ta hasi nos úniko pasobra kisas un kos ku no ta keda abo bon ta keda e otro persona si bon. “Nos mester aseptá nos diferensianan”, segun Mosa Nena.

 

Markanan ta pensando riba e kurva

Relashoná ku paña pa hende ku kurva Mosa Nena a bisa di a ripara ku mas i mas tin markanan ta bende paña kurvá. El a ripara esaki riba e enkargonan ku e ta haña i hopi kompania ta aserk’é pa promové i hasi kolaborashon ku nan. E tin markanan di paña deporte, e tin vários kos ku ántes hende lo no a pensa ku un modelo kurvá lo a pensa pa bisti. Mosa Nena ta gosa e kambio ei pasobra e muchanan mester por lanta i mira ku tin diferente sais i kolo.

 

Kurashi pa subi esenario

Pa loke ta e kompetensia nashonal pa modelonan kurvá, Mosa Nena a bisa komo direktor nashonal ku awor aki e ta wak ku e por haña mas kolaborashon lokal. E ke traha ku markanan di Kòrsou pa promové otro i pa e por organisá un sertámen nashonal ku ta di Ulanda i Kòrsou. I pa subi esenario Mosa Nena a bisa ku si e tabatin kurashi di subi un esenario anto tur hende por.

 

Hasi Kòrsou konosí

Mi ta representá e damanan kurvá pero mi ke representá Kòrsou tambe. Mi ke mustra mundu pasobra e final ta mundial, mi ke mustra kon bunita Kòrsou ta i kiko Kòrsou tin di ofresé. Mi ke haña mas tantu kolaborashon posibel pa asina mi por mustra kada pida di Kòrsou, kiko nos tin di ofresé, e lugánan bunita, playanan bunita, e markanan ku tin pa asina nos por hasi e sertámen algu grandi no pa e damanan so pero pa Kòrsou kompleto.

E hende muhé bunita

Un hende muhé bunita segun Mosa Nena ta un hende amabel, un hende ku no ta pensa solamente riba su mes i un hende ku ke yuda otronan krese kuné. Esei ta un hende muhé hopi bunita i manera mi a bisa kaba e bunita no ta di pafó so pero di paden i ta bria di pafó. No ta importá sais , kolo, tipo di kurpa pero e kos di paden ei ta hasié bunita. [email protected] pa tur informashon

 

LAGA UN KOMENTARIO

Please enter your comment!
Please enter your name here