WILLEMSTAD.- Na Kòrsou tin hopi interes pa kasnan di 3D Concrete. Asina Shendly Lacroes, ku ta Manager di 3D Concrete, ta bisa. 3D Concrete ta parti di kompania Betonindustrie Brievengat (BiB). Ku 3D Concrete e kompania ta ‘print’ kasnan. 3D Concrete ta traha ku un ‘printer’ ku ta print muraya di betòn ‘laag voor laag’. BiB ta traha huntu ku e kompania hulandes CyBe Construction, ku tin mas ku 10 aña di eksperensia ku 3D Concrete. BiB a konstruí un kas di modelo na Seru Loraweg i awor ta konstruí un otro kas riba e mesun tereno. Ku esaki BiB ta e promé kompania den Karibe ku a kuminsá ku kasnan di 3D 
Concrete.
Durante un dia habri, luna pasá, mas ku 700 hende a bishita e kasnan di modelo. Hopi di nan tin interes pa laga BiB konstruí un kas nobo pa nan. Lacroes ta splika ku 3D Concrete ta un forma moderno ku ta mas barata ku konstrukshon tradishonal i tambe ta bon pa medio ambiente. ‘Bo ta konstruí solamente e partinan ku bo mester, na un manera limpi i rápido’.
Banda di esei Lacroes ta splika ku kasnan di 3D Concrete ta sólido i duradero. E manera nobo di konstrukshon ta kumpli ku tur reglanan i pèrmit. ‘Hopi hende tambe ta puntra si kompania di seguro ta sigurá kasnan asina i si nan por haña un hipotek pa kasnan di 3D Concrete. E kontesta riba ámbos pregunta ta ‘si’.’
Lacroes ta splika ku tin basta interes for di kompanianan den Karibe tambe. Nan ke sa mas di e proyektonan di BiB. Segun Lacroes ku 3D Concrete por konstruí kasnan den un periodo kòrtiku ku kostanan abou. ‘Mi ta komprendé ku otro kompanianan ta interesá.’ Riba wèpsait di Janssen de Jong, ku ta e kompania di madre di BiB, ta skirbi ku konstrukshon di kas via 3D Concrete por ta un solushon pa korporashon ku ke konstruí kantidat grandi di kasnan. Kasnan di 3D Concrete por wòrdu usa komo kasnan sosial, Janssen de Jong ta bisa.
Banda di esei Lacroes ta bisa ku te ainda e método ta relativamente nobo na Kòrsou. E ta konvensí ku lo bin hopi petishon pa kasnan. ‘Ku e preis ekonómiko lo tin mas famia ku por kumpra nan mes kas. Esaki ta bon pa pueblo di Kòrsou i pa Kòrsou mes. Ku esaki nos ta duna un kontribushon na bienestar di nos pais.’
