Bibando ku Múltiple Sclerosis for di 2013

Ninza Cijntje; awor mi ta yuda guia otronan; bo mes por hunga un ròl aktivo den kon bo ta biba kuné.

Multiple Sclerosis (MS), un malesa sigur ku hopi di nos ta purba evitá di papia di dje, prinsipalmente pa motibu di loke nos ta lesa i mira riba medionan sosial. Miedu, desinformashon i stigma ta hunga un ròl grandi di e silensio. Pero esaki no mester ta e kaso. Ninza Cijntje, un hende ku ta biba ku Múltiple Sclerosis (MS), un malesa ku a keda detektá na dje na aña 2013, ta kòmbersá habrí, i pa splika kon e ta dil ku e malesa akí na un manera natural. Ora bo wak Ninza, bo no lo por kere ku e tin e kondishon akí. Hustamente pa e motibu akí, el a disidí di kompartí su historia: kiko MS ta, kiko el a siña den su propio trayekto, kiko el a hasi pa sigui biba un bida aktivo, i mas importante ainda, kon su eksperensia por sirbi komo sosten i guia pa otro hendenan ku ta biba ku MS.

Diagnostiká ku Múltiple Sclerosis

Ninza ta konta ku na aña 2013 direpente el a bira malu. Mesora su dòkter di kas a mira ku tin algu ku no tabata korekto, i a manda Ninza bai hospital. E tempu ei el a bai AMC, Amsterdam Medisch Centrum. Tabatin indikashonnan alarmante, spesialmente relashoná ku su bista. Segun e dòkternan, Ninza tabata sufri di ‘oogbewegingsstoornis’, un trastorno di moveshon di wowo. Un luna i mei despues, el a pasa un MRI-scan i el a keda diagnostiká ku Múltiple Sclerosis.

MS ta un malesa ku, segun hopi investigashon i artíkulonan ‘online’, ta un malesa ku ta rekonosé komo un malesa degenerativo, kaminda ku tempu e funshonamentu di bo kurpa por bai atras. Pero e realidat ta ku pa kada hende MS ta presentá su mes di un manera diferente. Manera Ninza a skucha ku el a keda diagnostiká, el a pensa: “Nò, e kos akí nò i, mi no ta bai e ruta ei.” El a bin kòrda riba e historia di kanser, kon hopi hende a logra kura òf stabilisá nan mes dor di kambio di kuminda i rutina di bida. Na e momentu akí, ainda siensia tabata sképtiko ku bo por kura bo mes di malesanan króniko. Institutonan manera Johns Hopkins University na Merka, spesialisá riba e tereno di kanser, a kuminsá investigá e influensia di kuminda riba kanser, i esaki a lanta un pregunta grandi den Ninza su kabes: “si kuminda por hunga un ròl asina grandi den kanser, dikon no den MS tambe?”

Kuminda por hunga un ròl…dikon nò

Ninza a puntra su zùster tokante di e posibilidat ei, pero e kontesta tabata limitá: “Kome bon no ta un garantia.” E ora ei el a disidí ku, aunke no tabata tin garantia, el lo hasi tur kos ku tabata den su poder pa yuda su mes. El a kuminsá gradualmente kambia su manera di kome i a drenta den un proseso serio di investigashon.

Na e momentu ei, dietanan manera ‘bloedgroep-dieet’ tabata popular, i Ninza a kuminsá wak kua tipo di kuminda e tin ku evitá segun su kurpa. El a saka bukinan for di kashi, el a lesa, buska informashon ‘online’ i a kuminsá identifiká kua produkto tabata problemátiko pa su kurpa. Su mama, na su turno, a haña un buki di un dòkter ku a logra stabilisá su propio MS dor di un manera natural. Na e momentu ei Ninza no tabata kla pa drenta den e informashon ei; su kabes tabata yen. Pero algun aña despues, ora el a topa ku e buki atrobe, el a realisá ku hopi kos ku e dòkter a rekomendá tabata mesun kosnan ku el a bin ta desaroyá: kome konsientemente, drumi bon, redusí strès i wak bon kua produkto di kas, i di kurpa bo ta usa.

Tur e kambionan aki a hasi un diferensia grandi. Nan a pone un brek riba e progreso di e malesa i Ninza su kondishon a bira notablemente mas mihó kompará ku ora el a keda diagnostiká. Pa e, esaki tabata e prueba ku, aunke MS no tin un solushon, bo mes por hunga un ròl aktivo den kon bo ta biba kuné.

Ninza a kuminsá mira kambio

Segun Ninza, e proseso tabata hopi gradual. Pa hende di pafó, e kambionan no tabata fásil pa nota, pero pa e mes tampoko. Na komienso, e no tabata konosé su kurpa bon ku e no por sinti si algu tabata bai den e direkshon korekto òf nò. Su úniko punto di referensia tabata e MRI-scan, ku e tabata hasi regular.

Na kuminsamentu, Ninza tabata pasa un MRI kada mei aña. Despues, e tabata pas’é kada un aña, i mas despues, kada dos aña. Sinembargo, a aparesé un leshon nobo, kaminda den kòmbersashon ku su dòkter a disidí pa bolbe kuminsá hasi e MRI tur aña. E MRI-scan tabata determiná si Ninza su kurpa tabata stabil, solamente e MRI por konfirmá si tabata tin leshonnan nobo òf si tur kos tabata bon. .

Tin momentunan kaminda Ninza a sinti kosnan den su kurpa ku no tabata tin nada di aber ku MS. I tin atrobe otro bia, kaminda e no a sinti nada spesial, pero e MRI a mustra indikashonnan relashoná ku MS. Esei a konfirmá ku sintimentu personal so no tabata sufisiente pa evaluá kon e malesa tabata evolushoná. Solamente dor di e MRI e por a haña un imágen real di loke tabata pasa internamente.

E periodo di COVID a bira un sorto di momentu bittersweet pa Ninza. Miéntras hopi porta tabata sera, otro nan tabata habri. El a haña tempu pa reflehá, pa studia mas i pa konfirmá ku e tabata riba un bon kaminda. Na mesun momentu, el a haña informashon nobo ku a yuda e i drecha e stapnan ku e tabata tuma pa reforsá su kurpa. E proseso ei a trese e na un situashon inesperá: Ninza a asta  hasi Thai boxing na Thailand, un reto físiko ku e mes nunka no lo a kere ku lo tabata posibel, spesialmente despues di a keda diagnostiká ku Múltiple Sclerosis.

Strès króniko, falta di deskanso i preshon konstante

“Gradualmente e ta bin riba bo,” Ninza ta splika. Múltiple Sclerosis no ta un malesa ku ta pasa direktamente di famia pa famia. E no ta hereditario den e sentido tradishonal. Aunke, bo por tin e ‘genes’, esaki no ta nifiká ku bo lo desaroyá e malesa. Loke sí ta konosí ta ku epigenétika ta hunga un ròl grandi: manera bo ta biba, loke bo ta kome, e strès ku bo ta karga, i kon bo ta traha ku bo mes, por “aktivá” e malesa.

Den su propio kaso, Ninza ta kere ku esaki tabata loke a sosodé. Loke el a mira, i loke e ta mira hopi mas aworakí, ta ku MS por ta un tipo di burnout profundo di e kurpa. Burnout no ta nifiká  solamente traha hopi, sino tambe pidi konstantemente mas di bo mes ku loke bo kurpa por duna. Ninza ta rekonosé ku el a forsa su kurpa hopi, i ku e balansa ei a kibra, ku finalmente a manifestá su mes den MS.

Segun e, probablemente hopi hende tin MS, pero loke ta determiná si e malesa ta sali òf nó, ta e rutina di bida ku un hende ta sigui. Strès króniko, falta di deskanso i preshon konstante por bira e aspektonan ku ta pone e proseso den moveshon. Pa Ninza, e komprenshon ei a bira un punto di importansia: no solamente pa dil ku MS, si no pa re-definí kon e ta trata su kurpa i su bida den totalidat.

Konseho pa ta mas konsiente di MS

Tur hende ta bai pasa den momentu den nan bida kaminda bo kurpa ta duna señalnan di burnout. Pa un hende e por ta den forma di MS, otro diabétiko, òf problema di kurason, dependé bo debilidat den bo DNA. Loke Ninza ta konsehá, ta pa semper tin tinu riba bo kurpa i skucha e señalnan ku e ta duna. Hopi bia nos ta tende, i mira e señalnan komo molèster, i tapa nan ku Paracetamol òf otro tipo di remedinan. Pero ora bo hasi esaki, bo kurpa ta kuminsá “grita” mas fuerte i mas duru, un atvertensia ku bo no por ignorá.

Den kaso di Ninza, su kurpa a duna señalnan, pero el a mira nan mas manera un indikashon ku e tabata traha duru òf ta drumi malu, i no un mensahe ku su kurpa tabata pidi yudansa. Netamente pa e motibu akí, Ninza ta kier yuda e pueblo di Kòrsou pa nan komprendé ku e señalnan ku nan kurpa ta duna no ta un molèster, sino un oportunidat pa intervení promé ku e malesa manifestá. E ta insistí ku si bo skucha bo kurpa na tempu, bo tin mas tempu pa rekuperá i pa drecha bo mes den un manera mas efektivo.

Segun medisina, e proseso ta difísil pa bira, pero Ninza ta pone énfasis ku bo por kura: e lo bai dura un ratu, pero si bo traha riba bo mes i skucha bo kurpa, bo por drecha tur kos pa restablesé i redusí e progreso di e malesa. “No tabatin momentu ku a bai hopi malu,” e ta splika, “manera mi a keda diagnostiká, mi a kuminsá hasi tur kos posibel pa sali pafó.”

Ninza a bin den kontakto ku hopi hende ku ta den e kondishon, i mayoria di e hendenan aki tabata keda den e mulina di medisina moderno, i despues di un par di aña nan a kombiná e kuido moderno ku métodonan natural. Durante e periodo ei, hopi di nan a bai patras, pero pa Ninza ta bisa ku e manera mas sigur ta pa kombiná e dos métodonan: stimulá e kurpa ku métodonan natural i traha riba bo mes, i si bo ta mira ku esaki no ta basta, e ora i bo ta pasa pa e medisinanan e moderno.

E ta sigui bisa ku bo mester paga bon tinu na e señalnan manera doló di kabes, desbalansa, òf bista ku ta konfuso. Tur esakinan por ta indikashon ku tin algu robes. Hopi bia nos ta no ta paga tinu na e kosnan chikitu aki, pasó nan ta simpel i difísil pa rekonosé mas aleu. Dòkternan ta bisa hopi bia ku “tur kos ta normal,” pero abo komo persona responsabel mester sigui pusha i drenta mas profundo pa wak kiko ta pasando bo realmente. Si bo sinti algu, i tèstnan ta bisa ku no tin nada malu, Ninza ta konsehá pa semper sigui buska i investigá. E prinsipio ei no ta solamente bálido pa MS, pero pa tur malesa.

Miedu pa konta su historia

Mas mihó bisa: “Miedu ku hende lo mira mi komo un víktima.” Ora hende tende ku bo tin MS, nan ke hasi tur kos pa bo, i esaki por tin konsekuensianan negativo, dor ku e ta baha bo energia i motivashon. Ninza, pa su mes, tabatin gana di bira bon bèk i no tabata ke e airu ei, pa no baha su gana di bringa pa bai dilanti.

Na 2024, Ninza a kuminsá yuda otro hende via konsulta a base di e nesesidat di kada persona. Originalmente, Ninza a studia sikologia, ku ta un dòkter di kabes, i ta usa esaki pa guia hende mentalmente, pa wak kiko nan ta pensa di nan mes i di nan malesa.

E ta splika ku yuda un persona ta un kombinashon di dos aspekto: e aspekto mental i e aspekto físiko. Na promé lugá, bo mester komprendé bo kurpa, despues analisá kon bo kurpa ta funshoná: kon bo ta kome, kua produkto bo ta usa riba bo kurpa, i kon e ta afektá bo hormonanan. Tur loke nos ta pone riba nos kurpa, kuminda, suplementonan, i produkto di kas ta konektá ku nos inflamashon i regenerashon.

Pa MS, inflamashon ta un tema grandi. Ora bo ta kontinuamente den un estado di inflamashon, bo kurpa no por rekuperá. Ninza ta konsehá pa bo buska pa haña sa spesífiko kiko ta trigger bo inflamashon i pa bo saka nan for di bo sistema, i pa di un forma moderá por re-introdusí nan despues.

Kurpa relahá ta regenerá i rekuperá energia

E parti di strès ta fundamental. Ora bo kurpa ta relahá, bo por regenerá i rekuperá energia. Si bo ta keda den strès tur ora, nada no ta sobra pa bo kurpa drecha. Ninza ta remarká ku kada hende ta diferente, i nan rutina i loke nan por tolerá ta úniko.

Ninza ta splika ku hopi di loke el a siña di sikologia ta superá su estudionan formal. Ku tempu el a deskubrí ku tur kos ta konektá: kurpa, mente, nutrishon, inflamashon.” Mi no por yuda bo ku e parti mental, si bo no ta kome bon i bo ta yen di inflamashon.” E ta duna un ehèmpel di suku, kaminda hopi suku ta na bo energia, pero despues bo ta sinti bo sin smak i depresivo. Un hende asina, bo por papia kuantu ku bo ke, pero si e no kambia su nutrishon, nada no ta bin dilanti, ni terapia mental ni otro esfuerso.

Pa bo implementá kambio, bo mester kere den e proseso promé ku tur kos; di dos, bo mester tin pasenshi. MS ta un malesa ku ta drenta tiki tiki, i bo progreso lo ta gradual. Pero si bo ta traha riba bo kurpa ku konsistensia i disiplina, bo por mira resultado i bo kurpa por hasi kos ku bo no tabata pensa ta posibel.

Counseling Nature  
Na Ulanda, Amsterdam, Ninza a habri un práktika pa tur hende ku ke yuda nan kurpa pa ta mas salú. E ta pa esnan ku tin malesa króniko, inkluso MS, pero tambe pa esnan ku ta salú pero ke ke algu èkstra pa reforsá nan kurpa.

Ninza enfatisá ku tur malesa króniko, segun dòkter, ta un reto pa biba kuné, pero ku e konosementu i eksperensia ku el a gana, e por yuda hende risibí konosementu práktiko. E ta bisa ku no tin mester di sufri; bo por bira bon. Dor di media sosial, Ninza ta aksesibel i dispuesto pa yuda tur hende ku tin e nesesidat. Orario i distansia no mester ta un barera. E ke yuda esunnan ku tin MS i tur malesa króniko, pa nan drecha nan kurpa i nan rutina di bida. Na e momento akí no tin un komunidat dediká na MS na Kòrsou, pero Ninza lo bai buska mas informashon pa por hasi esaki posibel.

Pa mas informashon…
Bo por tuma kontakto ku Ninza na www.counselingnature.com i reservá un yamada. Banda di esaki bo por manda un mensahe na info@counselingnature.com òf via di Facebook i LinkedIn: Ninza Cijntje. Na prinsipio, Ninza ta hasi un entrevista di inisio di dos ora i mei, pa asina e komprendé e persona, i pa bai den tur detaye ku e persona mester tene na kuenta.

Despues di e entrevista, e persona i Ninza ta planifiká kon nan ta bai traha huntu riba e puntonan ku a detektá durante e entrevista. E ta un total di 6 seshon, di kual den kada seshon Ninza ta evaluá kon a bai, i determiná unda mester hasi ahuste òf agregá algun kos èkstra, semper den kolaborashon ku e persona. E ta enfatisá ku e no ta manda bo hasi e ehersisionan, si no, Ninza ta guia bo den e proseso ku ta basá riba bo sintimentu i gana pa bira mas mihó.

Importante
Ninza ta kaba ku un mensahe balioso kaminda e ta bisa ku bo por sana di kualke situashon ku bo ta aden. No identifiká bo mes ku bo malesa, e ta un situashon ku bo ta enfrentá, pero no ta bo identidat. Buska yudansa serka hende ku tin mas konosementu di bo situashon, buska sosten, i hasi investigashon. No warda ora ta lat pa kuminsá traha riba bo salú. I na momentu ku bo bira fuerte, hasi uso di bo don i balor pa yuda otro, i asina bo por kontribuí na  reforsá i bienestar di nos komunidat.