WILLEMSTAD.- Direktor tékniko di selekshon nashonal di Kòrsou, Remko Bicentini, ta rekonosé ku Kòrsou su wega den di dos tempu tabata leu for di bon.
“Nos a krea algun oportunidat den promé tempu….pero mester skor”, segun e tékniko a bisa den konferensia di prensa despues dje partido. E ta satisfecho ku e wega di su ekipo den promé tempu, pero den di dos parti si a bai malu.
Bicentini a trese dilanti ku pa Kòrsou ta di dos partisipashon den Gold Cup i ku por bisa ku e hungadónan sigur a kustumá kompará ku e promé okashon.
E no ta mira ku e wega di ayera lo tin un efekto negativo riba e hungadónan. “Sigur nos tin chèns kontra di Honduras. Ta un wega nobo i nos mester tin konfiansa”. Bicentini ta rekonosé ku Honduras ta un ekipo bon i ku su ekipo awor tin e obligashon pa hunga na e nivel ku Honduras ta hunga.
Jamaica 3-2 riba Honduras
WILLEMSTAD.- Jamaica ayera nochi mester a bringa duru den minütnan final di wega di CONCACAF Golden League pa logra viktoria di 3-2 riba Honduras. ‘Reggae Boys’ hungando dilanti di nan públiko despues dje wega di Kòrsou/El Salvador a parse di por a logra un viktoria fásil na momento ku Dever Orgill a skor 2x den promé tempu pa manda e ekipo di kas ariba 2-0.
Pero na di 54 minit di wega Anthony Lozano ta skor pa Honduras (1-2). Dos minit despues Damion Lowe ta hasi e wega 3-1 pa Jamaica, pero di einan e wega a bira basta kompliká. Na di 92 minüt Rubilio Castillo ta hasi e wega 3-2, pero finalmente e hondureñonan ta keda kòrtiku.
Djabièrnè 21 ta sigui ku weganan dje grupo na Houston.
