A logra reskatá 13 turtuga
WILLEMSTAD. – Sea Turtle Conservation Curaçao, huntu ku Warda Kosta a mobilisá pa trata di skapa mas tantu turtuga posibel den bahianan di Ascencion i St. Joris, kaminda ku tin un situashon realmente alarmante di sargassum. Esaki ta un problema ku tur aña di nobo ta presentá.
E situashon aktual a pone ku Sea Turtle Conservation Curaçao a bati alarma relashoná ku e situashon alarmante di sargassum na Ascencion. For di djasabra último Sea Turtle Conservation Curaçao a saka kódigo kòrá pa e situashon di sargassum ku tin na Ascencion.
Esaki ta e kuminda ku bestianan chikí ta kome den laman pero tur aña di nobo den e temporada akí e sargassum ta yena kostanan parti nort masalmente. E bahianan ku mayoria bia ta keda afektá ta Ascencion i St. Jorisbaai.
Sea Turtle Conservation Curaçao ta monitoriá e situashon pa wak si esaki ta forma peliger pa e turtuganan. E situashon ku tin aktualmente na bahia Ascencion, e sargassum ta asina hopi ku el a kuminsá afektá e turtuganan. E turtuganan ta keda pegá bou di e sargassum i esaki ta pone ku nan no por bin ariba pa hala rosea. Konsekuentemente nan ta fayesé.
Aparte di esei, tin algun di e turtuganan ku si ta logra yega ariba pero debí na e kantidat di sargassum ku tin e ta bira difísil pa baha bèk i solo ta keda kima nan i e situashon tambe ta pone ku e turtuganan ta fayesé.
Reskate di turtuganan
Den wikènt tras di lomba Sea Turtle Conservation Curaçao a reskatá 13 turtuga. Por a tuma nota ku personal di Warda Kosta ku tambe a duna un man durante di e reskate aki. E turtuganan aki a keda hibá na sentro di bario na Boka Samí kaminda ku a pone nan bou di supervishon pa wak nan kondishon.
Ekspertonan a saminá e turtuganan aki pa wak si nan lo skapa i despues lo hiba nan Sea Aquarium kaminda nan ta bai den un baki spesial pa keda bou di opservashon i risibí kuido spesial.
Petishon pa yudansa
Sea Turtle Conservation Curaçao ta hasi un supliká na tur persona ku por yuda di un manera òf otro pa duna un man. Si bo tin kabuya largu, kaha grandi, sapatu di landa, sèrbètè ku bo no ta usa mas, tur esaki nan ta yuda pa ku reskate di e turtuganan.
Tambe tin e posibilidat pa por yuda dor di tira bista riba laman di Ascencion i St. Jorisbaai i na momentu ku tuma nota di turtuganan ku mester di ayudo, informá Sea Turtle Conservation Curaçao inmediatamente na +59996647970 pa di e forma aki nan por yuda e turtuganan.
