Walid Saadaou i Amar Hussein kendenan tabatin plan pa mata hopi hudiu den un tiru.
MANCHESTER, Inglatera (AFP).- Dos hòmber a keda kondená na bida largu di prizòn pa hustisia britániko despues ku nan a plania un atake grandi kontra di komunidat hudiu den e region di Manchester, ku ta keda den parti nort di Inglatera.
Walid Saadaou, di 38 aña, i Amar Hussein, di 52, a keda deklará kulpabel den 2025 di a prepará entre desèmber di 2023 i kuminsamentu di mei di 2024, un atake destiná pa kousa “mayor kantidat posibel di viktima”. Nan dos tabatin e partikular, e intenshon di ataká un marcha kontra di ante-semitismo den Manchester.
E hues di tribunal di Preston a anunsiá kondena na bida largu, ku un periodo mínimo di kastigu di 37 aña pa Saadaou i di 26 aña pa Hussein. Durante e sentensia, e hues Justice Wal a trese dilanti ku e atake, den kaso ku e no a keda impedí pa un agente ku a infiltrá, “probablemente lo a bira un dje atentadonan terorista mas mortifero perpetrá riba suela britániko”. Pa realisá e atentado, Walid Saadaou, di Tunesia, tabatin e intenshon pa introdusí den Reino Uni kuater fusil di asalto AK-47, dos pistol i 900 bala. Pa yuda nan den e plan, el a reklutá Amar Hussein, siudadano kuwaití. Polis por a frustra e atake dor di vigilá Saadaou despues ku esaki a usa dies kuenta di Facebook ku nòmbernan falsu pa publiká komentarionan antisemita.
Ora ku a detené Saadaou dia 8 di mei di 2024, el a kere di tabata papia ku un intermediario pa importashon dje armanan, siendo ku tabata un agente ku a infiltrá.
