WASHINGTON, MERKA, AFP.- Presidente Joe Biden a anunsiá djamars ku tur adulto den Amérika lo bini na remarke pa un vakuna kontra COVID-19 dentro di e próksimo dos simannan.
Biden a anunsiá den un diskurso na Kas Blanku ku e lo move e fecha límite pa tur esnan riba 18 aña bini na remarke pa haña e vakuna kuminsando 19 di aprel. E meta anterior tabata 1e di mei.
“Nos ta hasiendo e mas fásil pa tur hende haña un inyekshon”, asina Biden a bisa, “Nos ta e promé pais ku a atministrá 150 mion inyekshon i e promé pais ku a vakuná mas di 62 mion persona kompletamente”. Biden su fecha límite di 19 di aprel ta nifiká ku ta anulá tur restrikshon di edat, problema ku salú òf otro kategorianan ku ta wardando pa haña e vakuna. Esaki no ta nifiká ku tur hende lo haña e vakuna aki mesora, pa motibu ku mester distribuí e vakunanan aki.
Estado di California ta preparando pa habri kompletamente riba 15 di yüni, kaminda lo kita tur restrikshon relashoná ku COVID riba empresanan i reunionnan, segun indikashon di Gobernador Gavin Newsom. Apesar di e progreso, funshonarionan ta preokupá ku e infekshonnan lo bolbe subi despues di mas di un aña ku e pueblo mester a bisti tapaboka i mantené distansia sosial.
