ATLANTA, USA (AFP).- Presidente merikano Joe Biden, ayera a pidi pa stòp ku e atakenan den Gaza i a sigurá dilanti di studiantenan di un universidat batí pa ola di protesta, ku e ta trahando pa logra “un pas duradero”, inkluso den kreashon di un estado palestino.
Den su diskurso na e universidat dje siudat di Atlanta, kaminda ku e aktivista di koló i héroe di derechinan sivil Martin Luther King a studia, Biden, den pleno kampaña pa reelekshon den novèmber, a bisa di ta apoyá un akuerdo di pas pa hinter e region ku “un solushon di dos estado, komo e úniko solushon”.
E campus di e sentro di estudio dje estado di Georgia tabata un dje hopi esenarionan di protesta pro-palestino ku a pone ku outoridatnan mester a intervení pa kore ku esnan ku ta protestá. E bishita dje presidente ta pa buska pa alkansá e elektorado afroamerikano i e hóbennan.
“Mi ta apoyá e protestanan pasífiko i no violento. Mester skucha nan bos i mi ta primintí ku lo mi hasi esei”, Biden a bisa durante un seremonia di graduashon di entrega di diploma na Morehouse College di Atlanta.
Meimei di e kampaña elektoral, e studiantenan dje universidat, histórikamente di mayoria komunidat di koló, a pidi e atministrashon pa kanselá e diskurso dje demokrat, pa motibu di su apoyo na ehérsito di Israel.
Durante di su diskurso, Biden a trese dilanti ku e guera den Gaza mester stòp, tambe ku Hamas mester entregá e rehennan bèk na Israel i a sigurá di ta trahando pa “un pas duradero” den hinter e region, inkluso ku kreashon di un estado palestino komo “úniko solushon” final dje konflikto.
