WASHINGTON, MERKA, AFP.- Presidente merikano Joe Biden i e sekretaria di Finansa Janet Yellen a reuní ku empresanan grandi, inkluyendo lidernan di Walmart, JPMorgan, Chase i e tienda di paña Gap, pa papia tokante nan inisiativa pa subi salario mínimo.
Den su plan di yudansa ekonómiko di 1,9 bion dòler kual Kongreso ta debatiendo aktualmente, e mandatario demókrata a inkluí un proposishon pa dupliká e kantidat di salario mínimo federal na 15 dòler pa ora pa 2025.
E empresanan, partikularmente esnan chikitu ta kontra tur kosto adishonal debí na e aktividatnan di pandemia.
Yellen a bisa ku e oumento aki lo ta unu gradual pa duna empresanan sufisiente tempu pa adaptá. E kantidat di salario mínimo ta 7,25 dòler aktualmente.
E proposishon aki ta un medida klave pa kombatí pobresa. E ofisina di Servisio Presupuestario di Kongreso (CBO) a bisa ku e proposishon lo kousa pèrdida di 1,4 mion puesto di trabou pa 2025, pero lo saka 900.000 persona for di pobresa.
E presidente di Kámara di Komersio di Merka, Tom Donohue i e visepresidente Kamala Harris tambe a partisipá den e enkuentro aki.
