WASHINGTON, USA (AFP).- Presidente di Merka, e demokrat Joe Biden, i su rival republikano Donald Trump, lo tin dos debate elektoral den nan kampaña pa White House, e promé dia 27 di yüni.
Despues di lunanan di duda si e tradishonal debatenan lo tuma lugá e biaha’ki, Biden, di 81 aña, ayera a proponé na Trump (77) dos enkuentro kara kara riba kaminda pa elekshon di novèmber.
“Komplasé mi, amigu. Mi ta kla pa te asta dos debate”, segun e presidente riba un video ku a keda publiká.
“Laga nos pone fecha, Donald. M’a komprondé ku bo tin djárasonnan liber”, el a agregá ku algu di chèrchi, refiriendo na e dianan liber dje tribunal di New York ku ya pa un luna ta husgando e eks-mandatario.
Dirèkt, Trump a reakshoná na e reto. “Mi ta kla i ku gana”, el a kontestá riba su página Truth Social. “Nos ta kla pa e pelea”, el a agregá.
E kadena CNN a anunsiá ku e promé debate lo tuma lugá dia 27 di yüni den su sede di Atlanta, sin públiko den studio. E di dos ta 10 di sèptèmber, i lo tin komo sede e kanal ABC.
Konfirmando e debate na ABC, Biden a komentá den tono provokador: “Trump ta bisa ku e mes lo regla su transporte. Ami tambe. Lo mi bai den mi avion. Mi tin pensá di tin’e pa kuater aña mas”.
Ademas, Trump a bisa di a aseptá un invitashon dje kanal konservador Fox News pa un di tres debate, unu kara kara rechasá pa e kampaña di Biden.
Biden a evitá e tres enkuentronan proponé pa e komishon bipartidista di debatenan elektoral di Merka i a opta pa ofresé dos enfrentamentu, den yüni i sèptèmber, sin públiko i organisá pa medionan di komunikashon.
“Donald Trump a pèrdè dos debate kontr’i mi den 2020. For di despues di esei e no a presentá den ningun otro”, segun Biden a bisa.
Riba Truth Social, e eks-mandatario a deskribí Biden komo “e hende di polémika di mas malu ku el a enfrentá i despues di a konfirmá ku e ta oké pa debate a pidi “un lugá mas grandi, ounke di mes Biden tin miedu di multitutnan”.
