WASHINGTON, USA (AFP).- Mas determiná ku nunka, Joe Biden ayera a hasi un apelashon na kongresistanan demokrat pa respaldá su kampaña di reelekshon òf pa nan reta su persona den e konvenshon dje partido den ougùstùs, indikando ku e no ta tira sèrbètè den ring.
“Mi ta firmemente determiná pa sigui den e kampaña”, el a skirbi di forma desafiante den un karta na kongresistanan demokrat. “E tema kon pa sigui ya a keda tratá, i awor ta momento pa pone fin na e polémika”, segun el a bisa.
Bosero dje presidente a purba na para e ola di spekulashonnan provoká pa un artíkulo di New York Times ku ta sigurá ku un eksperto di Parkinson a bishitá White House ocho biaha den último ocho lunanan, entre zomer di 2023 te ku resien.
“E presidente a keda tratá pa Parkinson? Nò. “E ta keda tratá awor aki pa Parkinson? Nò, esei no ta e kaso. “E ta tumando remedi pa Parkinson? Nò”, segun e bosero Karine Jean Pierre den konferensia di prensa.
E bosero no a splika e meta dje bishita dje eksperto i a referí na e obligashon di “konfidensialidat”.
Parkinson
E bosero a rekordá ku Joe Biden a keda eksaminá tres biaha pa un neurólogo komo parti di su eksámennan di tur aña, e último ku a keda publiká den febrüari, i ku den e konteksto ei el a hasi tèstnan pa detektá diferente enfermedat neurodegenerativo, ku resultadonan negativo.
Biden, di 81 aña, a rekonosé serka kongresistanan di ta konsiente dje “preokupashonnan”, mas ainda despues di su prestashon desastroso den un debate na televishon kontra su predesesor i rival pa elekshonnan di novèmber, Donald Trump.
Durante dje 90 minütnan el a mustra hopi konfuso, tabata pega ora di papia i te asta tabata varia for di temanan. E presidente a referí na e okashon ei na kansansio i ferkout, pero den último dianan vários kongresista demokrat a hasi un yamada na su persona pa bandoná kampaña.
