WASHINGTON (AFP).- Presidente di Merka, Joe Biden, a kompará Los Angeles ku un “esenario di guera”, na momento ku vários kandela ta sigui devorá barionan den e siudat den California.
“E ta laga mi kòrda riba un esenario di guera, kaminda tabatin sierto ophetivonan ku ta keda bombardiá, segun Biden a ekspresá despues di a risibí informashon riba e kandelanan. “E ta kasi un esenario di bataya”, segun el a indiká.
Biden, kende lo sali for di White House dia 20 di yanüari, mas aleu a indiká ku tin ”pruebanan bon kla di sakeo” meimei dje káos generá pa e kandelanan.
Den e sentido ei, e mandatario demokrat a garantisá ku gobièrnu ta dunando seguridat na e área ku apoyo di militarnan di di Guardia Nashonal.
“Tin pruebanan bon kla ku tin hende ta bai den e barionan i ta hòrta kos”, segun el a bisa.
Outoridatnan a imponé un toke de keda nokturno den partinan di Los Angeles afektá pa e kandelanan meimei di temor ku e kantidat di sakeonan lo sigui krese.
Tambe Biden a sita, sin spesifiká, esnan ku ta usa e sirkunstansianan pa duna informashon falsu relashoná ku e kandelanan.
“Lo bai tin hopi demagogo tratando na probechá dje kos akí”, segun Biden, den loke por keda konsiderá komo un atake indirekto na e Presidente entrante, e republikano Donald Trump, kende a duna algun informashon robes tokante dje kandelanan.