WASHINGTON, USA (AFP).- Presidente Joe Biden a hasi un apelashon pa no daña e relashon di Merka ku su sosionan México i Canada, despues ku Donald Trump a menasá na imponé belasting di 25% riba importashon for di e paisnan ei. “E delaster kos ku nos tin mester, ta di ruina e relashonnan ei”, segun Biden den deklarashon na reporteronan.
Biden a bisa di ta spera ku Trump lo “rekonsiderá” e proyekto ora ku e sinta komo presidente na kabamentu di yanüari próksimo.
E futuro mandatario djaluna último a menasá na imponé belasting di duana di 25% riba tur merkansia ku México eksportá pa Merka si e gobièrnu di Claudia Sheinbaum no para e fluho di migrantenan iregular i e tráfiko di droga via e frontera entre e dos paisnan.
E atvertensia tambe a inkluí Canada, e di tres sosio dje akuerdo li komersio liber norteamerikano T-MEC.
Sheinbaum djamars a manda un karta pa e magnate ku e atvertensia ku migrashon i konsumo di droga no ta keda resolvé “ku menasanan” i ku Merka imponé sierto tip di belasting, México lo tuma un medida similar.
Pero ayera, despues di un yamada telefóniko ku Trump, el a deskartá “un guera di belasting” ku Merka.
Durante dje kampaña, Trump a presentá e tipo di belasting ei komo pilar di su polítika ekonómiko.
E idea ta pa finansa e rekorte di belasting, stimulá empresanan pa establesé na Merka i usa e derechinan di duana komo moneda di kambio pa futuro negosiashonnan komersial.
