WASHINGTON, MERKA, AFP.- Eksaktamente un aña despues ku el a sinta komo presidente, Joe Biden ta pone su atenshon riba su programa di infrastruktura pa trata na purba lubidá e enkuestanan malu i e parálisis parlamentario na Merka.
Leu di promesanan solem di uni e merikanonan ku el a bisa dia 20 di yanüari den Capitol, e presidente a konmemorá e promé aniversario di un manera hopi mas konkreto.
A reuní na Kas Blanku e ekipo enkargá di supervisá e gastu di 1,2 bion di dòler ku ke invertí pa reforma e infrastruktura. E programa gigantesko aki ta un di e poko éksitonan di un presidensia ku ta pasando den tempunan difísil. E ta un tema tambe den un pais manera Merka kaminda kada bes nan no ta di akuerdo ku otro riba nada. Alomenos na e okashon aki e lei ta konta ku aprobashon di algun parlamentario republikano.
