WASHINGTON, MERKA, AFP.- Joe Biden a bira e di 46 presidente di Merka djárason, i inmediatamente el a pone fin na sierto polítika di Donald Trump.
Biden a keda inougurá ofisialmente komo presidente despues ku Kamala Harris a inougurá komo e promé muhé pa bira visepresidente di Merka.
“Demokrasia ta frágil, i demokrasia a prevalesé”, asina Biden a bisa dilanti di National Mall ku tabata virtualmente bashí pa motibu di e medidanan fuerte di seguridat i e pandemia di COVID-19 ku el a primintí di kombatí inmediatamente.
Trump a kibra 152 aña di tradishon pa motibu ku el a ninga di partisipá na inougurashon di su susesor.
Manera el a drenta Kas Blanku, Biden a firma un serie di dekreto, i a hinka Merka bèk den e akuerdo klimatiko di Paris. Trump a saka Merka for di e akuerdo, i ta e úniko pais ku a hasi esaki. Ademas, Biden a para e proseso pa saka Merka di Organisashon Mundial di Salú, anulá e desishon pa tene mòslemnan di diferente pais for di Merka i a para konstrukshon di Trump su muraya ku frontera di México.
