SAN FRANCISCO, USA (AFP).- E presidente Joe Biden ta insistí den liberashon inmediato di e rehennan kapturá pa Hamas na Israel. El a hasi esaki durante kombersashon ku e lider di Qatar, ku tin relashon ku e militantenan dje grupo islamita.

Biden, kende ta na San Francisco pa kumbre di lidernan di Asia-Pasífiko, a sostené un yamada telefóniko ku e emir qatarí. E sheik Tamim bin Hamad Al-Thani, ku kende “el a diskutí nesesidat urgente pa tur e rehennan di Hamas por haña nan libertat sin tardansa”, di akuerdo ku un komunikado di White House.

Biden tambe a rekordá e desishon di Israel pa permití e entrada di dos trùk di diesel kada dia den Gaza, devastá pa e guera, despues di petishonnan di Merka.

Dos dia promé, Biden a bisa na periodistanan ku e tin “speransa leve” di yega na un akuerdo pa liberá e rehennan, entre nan mas o ménos 10 siudadano norteamerikano.

E atake aéreo i na tera di Israel riba kombatientenan di Hamas a kousa morto di 12.000 persona, inkluyendo 5.000 mucha, segun Ministerio di Salú di Gaza.

E militantenan dje grupo islamita Hamas ta konta ku respaldo dje estado kleriko di Iran i ta mantené un ofisina polítiko na Qatar, ku sinembargo ta un sosio yegá na Merka.

Den último añanan Qatar a rechasá inisiativanan di otro monarkanan árabe dje Golfo pa normalisá relashon ku Israel.

LAGA UN KOMENTARIO

Please enter your comment!
Please enter your name here