WASHINGTON, MERKA, AFP.- E presidente demókrata Joe Biden a selebrá djaweps di 13 aniversario di e Lei di Kuido di Salú konosí komo Obamacare, un reforma di e sistema di salubridat ku, segun e, a “kambia Merka” pero ta bou di menasa di e republikanonan.
Biden, kende posiblemente lo postulá komo presidente atrobe pa 2024, a afirmá ku e ta trahando pa redusí e kostonan di e sistema di salubridat di Merka i a bisa ku kontrali na e republikanonan su plan, no mester kòrta den fondonan di gobièrnu.
“E republikanonan di MAGA den Kongreso tin intenshon di retirá e Lei di Kuido di Salú di Preis Abou”, asina Biden a bisa den un akto di selebrashon na Kas Blanku. El a referí na e ala radikal di e republikanonan ku a kai bou di Donald Trump, èks presidente i pre kandidato pa elekshon di 2024.
E republikanonan a purba retirá e lei for di na 2010, e aña ku el a keda aprobá i temporada Biden tabata visepresidente di Barack Obama.
