WASHINGTON, MERKA, AFP.- Presidente Joe Biden a sigurá djaweps ku Merka lo evitá un default. Ounke ku legisladornan a kuminsá ku un reseso di 10 dia, ainda no a yega na un akuerdo riba e oumento di límite di debe di e nashon.
Falta 1 siman pa 1e di yüni, e fecha ku gobièrnu lo no tin mas plaka pa paga su debenan. Esaki por kousa un “temblor” ku por afektá merkadonan mundial.
Sinembargo, miembronan di Kongreso a bai ku fakansi pa probechá di Memorial Day i nan lo no regresá promé ku dia 4 di otro luna.
“Lo no bini un default”, asina Biden a sigurá na Kas Blanku i a añadí ku su negosiashonnan ku e presidente republikano di Kámara di Representante “Kevin McCarthy” tabata produktivo.
Pero e lider di minoria demókrata den e kámara, Hakeem Jeffries a kritiká e republikanonan. El a akusá nan di bandoná nan trabou na Washington i kousa un posibel krísis ku nan mes a krea.
E republikanonan ta eksihí pa baha gastu públiko ku 130.000 mion dòler a kambio di oumento di e plafòn di debe.
