WILLEMSTAD.- Lamentablemente Kòrsou ta hopi sushi ainda, apesar di e kampaña di gobièrnu na 2024 pa pone bakinan di shushi grandi den bario i habri landfill pa tur hende por depositá nan shushi pòrnada. Asina Sharo Bikker di Curaçao Clean Up ta remarká den e podcast ‘3’or ku Gino’ riba plataforma digital di EXTRA. “Apesar di tur e bon akshonnan aki, tòg nos isla no ta limpi ainda.”
Bikker ta spera ku gobièrnu por ripití e akshon di pone bakinan grandi pa rekohé sushi den bario atrobe. E ta mustra ku limpiesa mester ta un akshon duradero i no algu di algun luna. Komo ehèmpel Bikker a mustra ku Curaçao Clean Up a lanta komo algu spontáneo di algun hende ku kier a limpia Kòrsou den 1 dia. 13 aña despues ainda e organisashon ta eksistí.
Asina ora a disidí pa sigui ku e organisashon, a kuminsá traha banda di limpiesa riba konsientisashon di poblashon tambe riba shushedat. A purba di hala atenshon di hende riba nan komportashon. Den sierto sentido Bikker ta kere ku e situashon a bai dilanti i ku hendenan ta mas konsiente.
“Un ehèmpel ta ku riba dia mundial di limpiesa ta haña hopi boluntario. Esaki di otro banda ta trese su retonan kuné manera gastunan envolví.” Curaçao Clean Up ta ripará sinembargo ku no por keda limpia Kòrsou 1 biaha pa aña so.
E dia mundial di limpiesa ta mas bien pa konsientisá hende. Konsekuentemente e organisashon a bai wak mas leu ta kiko ta e problemanan i a yega na algun konklushon manera komportashon di hende i oumento di uso di plèstik. Tambe Curaçao Clean Up a tene un akshon di firma i a entregá esaki na gobièrnu kaminda komunidat ta indiká kiko nan ke mira, manera bakinan grandi den bario pa tira tur tipo di sushi aden.
Bikker ta bisa ku hendenan tin e bon intenshon, pero mester di mas kos. Ta den e kuadro aki Curaçao Clean Up ta bai lansa un sistema digital edukativo pa hóbennan di skolnan sekundario. Ta bai lansa e sistema aki pronto ku ta traha riba konsientisashon di hóbennan.
E organisashon ta mira tambe ku komèrsio ta tuma inisiativa pa hendenan por trese nan plèstik. Banda di esaki tin e akshon di Kunuku Man di tur wikènt ku ta hasi limpiesa kantu di kaya na diferente sitio, Bikker ta bisa. Tur esakinan segun Bikker a kontribuí na mas konsientisashon.
“E komportashon aktual ta algu ku a krese durante di hopi aña i ku no a koregí i no a aktua (“handhaving”) kontra dje.” Loke segun Bikker tampoko ta yuda ta legislashon pa prohibí uso di plèstik i foam. Mayoria pais den region a pasa un tipo di lei asina, pero na Kòrsou e lei ta pegá ainda un kaminda.
Foto:
…Sharo Bikker…
