WILLEMSTAD. – Ayera Presidente merikano Donald Trump tabatin un reunion ku ehekutivonan di kompanianan di mas importante den produkshon di Gas i petrolio, ku e enfoke pa invertí den infrastruktura petrolero di Venezuela. E kompanianan ta hasi menshon di invershon di vários bion dòler den infrastruktura.
E loke ku a hala atenshon ta e echo ku na final di e rueda di prensa ku tabatin, promé ku a reuní tras di porta será, tur ehekutivonan a haña palabra pa ekspresá nan gratitut pa e oportunidat ku nan a haña pa forma parti den e desaroyo na Venezuela.
Un di e ehekutivonan tabata Bill Armstrong di Armstrong Oil & Gas ku ta un di e kompanianan grandi den e mundu di eksplorá petrolio i nan ta na hopi pais na mundu.
Amstrong a splika ku pa loke ta trata Venezuela, nan ta kompartí 150 mia di kosta venezolano ku paisnan manera Kòrsou i Aruba, enfokando asina e importansia di e islanan aki den nan plan di operashon.
Armstrong a enfatisá ku e oportunidat aki, nan ta kla pa bai Venezuela pa kuminsá traha.
Durante e reunion di ayera Presidente Trump a splika kiko nan lo bai hasi awor ku nan tin kontròl riba e petrolio di Venezuela huntu ku Merka nan tin kontròl di 55% di petrolio na mundu.
Trump a splika ku nan lo sòru pa no solamente Merka sali bon afó, pero tambe e pueblo venezolano. tambe, kaminda ku lo pone e pais riba un nivel di bida kaminda ku henter e pueblo lo tin prosperidat.
Na e reunion tabata presente kompanianan petrolero grandi manera Chevron ku ta na Venezuela kas pa 100 aña, ExxonMobil, ConocoPhillps i vários otro kompania mas manera Armstrong Oil & Gas.
E reunion a enfoká prinsipalmente riba mobilisá e kompanianan petrolero prinsipal pa invertí den e infrastruktura petrolero di Venezuela bou di e ouspisio di Merka.
Trump a garantisá nan tambe ku nan no mester ta preokupá pa aspektonan legal i di siguridat.
Durante e reunion a bin dilanti ku Kòrsou por tin un ròl importante regional di apoyo si e fluho di petrolero venezolano oumento pa e merkado bou di marko stratégiko nobo, esei ta loke ku Armstrong a enfoká den algun palabra.
Si e produkshon di krudo venezolano oumentá e instalashonnan logístiko i di refinamentu na Kòrsou por bira strategikamente balioso pa invershonistanan i posiblemente pa metanan di polítiko di Merka.
Mester menshoná ku na febrüari 2024 Armstrong tabata na Aruba, kaminda ku nan a firma un MOU pa eksplorá gas i petrolio den awanan di Aruba.
Ku e desaroyo aktual na Venezuela, porta por habri pa Kòrsou su sektor petrolero atrobe.
