Èks-presidente merikano, Bill Clinton, (r) riba un potrèt huntu ku Jefrrey Epstein.
WASHINGTON (AFP).- E èks-presidente norteamerikano, Bill Clinton, a sigurá dilanti di un komishon di Kámara di Representantenan di Merka di no tabatin konosementu di e aktonan dje delinkuente seksual Jeffrey Epstein i ku e no tabata su kómplise. E Komité di Supervishon di Kámara di Representante, dominá pa republikanonan, ayera a publiká e grabashonnan dje oudiensia ku nan a hasi djaweps tras di portanan será bou di huramentu di Hillary Clinton, èks-sekretario di Estado i di su kasá, e èks-presidente Bill Clinton, djabièrnè. Kada un di nan ku durashon di poko mas ku kuater ora i mei.
E deklarashonnan a keda tumá na Chappaqua, New York, kaminda e pareha ta biba. Ora ku a puntr’é riba posibel “kontaktonan seksual” ku mucha muhé hóben ku a keda presentá na su persona dor di Epstein òf su kómplise Ghislaine Maxwell, e èks-presidente demokrat a respondé di forma negativo.
Clinton a relatá un kòmbersashon ku Donald Trump, ku ta data di añanan 2002 òf 2003, durante kua e último a splik’é ku su kiebro ku Epstein tabata pa un disputa riba un propiedat inmobiliario ku tur dos ker a kumpra.
Den luna di yüli, Trump a duna un vershon nobo dje kiebro di amistat. Nan dos tabata amigunan íntimo komo parti dje jetset di New York i Florida. E disputa tabatin di aber ku trahadónan femenino hóben dje spa di Trump den Mar-a-Lago, den Florida, reklutá kontra di su boluntat pa Epstein, entre nan Virginia Giuffre, e tempu ei menor di edat. Giuffre, e persona prinsipal ku a akusá Epstein, a kometé suisidio den aprel di 2025.
Anteriormente, White House a sigurá ku Donald Trump a ekspulsá Epstein di su klup di Mar-a-Lago pa motibu di “komportashon sin moral”.
Mientrastantu, Hillary Clinton a pidi ku e entrevistadónan por tuma deklarashon dje aktual presidente. E legisladornan mester puntra Trump “di forma dirèkt i bou di huramentu riba e desena di míles di biaha ku su nòmber ta aparesé den archivonan di Epstein”.
