NEW YORK, MERKA, AFP.- E komediante Bill Cosby a rekobrá su libertat djárason, algu despues ku un korte merikano a anulá su kondena pa droga i agredí un muhé seksualmente 15 aña pasa. Esaki ta un kontra tempu pa e movementu #MeToo.

Cosby di 83 aña a Sali di SCI Phoenix, un prizòn estatal, alrededor di mitar di tres di mèrdia, segun un funshonario di prizòn.

Su liberashon a sosodé despues ku Korte Supremo di Pennsylvania a dikta ku Cosby su huisio den 2018 no tabata hustu, despues ku el a keda kondená pa agredí Andrea Constand den su mansion na Philadelphia na aña 2004.

Cosby a kibra bareranan rasial ku su ròl den “I Spy” den dékada di 1960, kual a gana un Emmy. Despues di esaki el a kontinuá komo tata i dòkter den e serie eksitoso di televishon “The Bill Cosby Show” dos dékada despues. I algun aña pasa desénas di akusashon di kondukta seksual no apropiá a surgi den su kontra.

Su kondena a bira e promé veredikto di kulpabilidat di agreshon seksual kontra un selebridat desde ku e movementu mundial #MeToo a paresé. Cosby a para riba su inosensia i a kumpli ku mas di dos aña di sentensia.

Ounke mas di 60 muhé a denunsia ku nan tabata víktima di agreshon seksual di Cosby, e aktor a wòrdu husga solamente pa agreshon kontra Constand, pa motibu ku e otro kasonan a ‘verjaar’.

LAGA UN KOMENTARIO

Please enter your comment!
Please enter your name here