NEW YORK, MERKA, AFP.- Bill Gates, e multimionario ku a funda Microsoft i su kasá Melinda, kreadornan di un fundashon gigantesko ku ta kombatí pobresa i enfermedat, a anunsiá nan divorsio djaluna despues di 27 aña di matrimonio.
“Despues di hopi pensa nos a tuma e desishon pa finalisá nos matrimonio”, asina nan a bisa den un komunikado konhunto publiká riba Twitter.
E pareha, un di esnan di mas riku na mundu ku un fortuna di 130.000 mion dòler a anunsiá ku nan lo sigui traha huntu riba Fundashon Bill i Melinda Gates, kual nan a krea mas di dos dékada pasá pa kombatí pobresa, enfermedatnan i desigualdat rònt mundu. Aktualmente, Bill Gates di 65 aña ta e di kuater hòmber mas riku na mundu segun Forbes.
Bill i Melinda Gates a transferí 20.000 mion dòler di nan akshonnan di Microsoft pa e fundashon, kual ta e organisashon karitativo privá di mas grandi na mundu. E multimionario Warren Buffet tambe a duna parti di su fortuna na e fundashon. E fundashon ku ta konta ku 1.600 empleado a invertí 53.800 mion dòler desde aña 2000 segun indikashon di esaki su wèpsait.
