WASHINGTON (AFP).- E multimionario Bill Gates dia 10 di yüni lo deklará dilanti di un komishon di Kongreso di Merka den e kaso di Epstein. Kongreso ta investigando e konekshonnan dje defuntu delinkuente seksual Jeffrey Epstein, segun un fuente yegá na e tema.
E ko-fundadó di Microsoft ta figurá entre e nòmbernan ku ta aparesé den e dokumentonan publiká pa Deportamentu di Hustisia, ku a revelá amistatnan yegá, tambe operashonnan finansiero ilegal i potrètnan privá di personalidatnan prominente huntu ku Epstein. Segun un bosero dje multimionario, sitá pa “Politico”, Gates “ta kontentu” ku e oportunidat pa komparesé dilanti e komishon. “Nunka el a asistí ni partisipá den ningun akto ilegal di Epstein”, pa e motibu ei, “e ta deseá na kontestá preguntanan di e komishon pa apoyá e labor importante aki”, segun el a agregá.
Na fin di febrüari último, Gates a deklará dilanti miembronan di direktiva di su fundashon ku su kontaktonan ku Epstein tabata “un eror grandi”. Ounke el a nenga kualke implikashon den e aktividatnan ilegal dje finansiero, kende a kometé suisidio den prizon den 2019 na momento ku e tabata den espera pa keda husgá pa tráfiko seksual ku menornan.
“Mi no a hasi nada ilegal… mi no a mira nada ilegal”, segun Gates a yega di bisa. Gates a yega di rekonosé di tabatin dos aventura seksual, pero a nenga kualke relashon ku e víktimanan di Epstein.
