Binánan di Kòrsou a bira kuminda di luho na Bándabou

foto Hubert de Palm

Pronto e kolonia lo kaba

WILLEMSTAD. – No opstante e esfuersonan pa salvaguardá e kolonia di biná di Kòrsou, dia pa dia nan ta birando ménos. Nan ta resultando den kuminda di smor i stobá i tin biaha hasta riba bbq,  asina diferente persona di Bándabou a informá EXTRA e siman aki.

Nan a referí na entre otro deklarashonnan di e organisashon CARMABI ku a bisa ku mester protehá e tipo di animalnan aki ku ta kabando poko poko. Binánan di Kòrsou ta endémiko loke ta nifiká ku ta na Kòrsou so ta haña nan.

E personanan ku EXTRA a papia kuné a bisa ku karni di biná ta birando un tradishon di Bándabou. “E ta kome masha dushi mes. Mi tin ku atmití esei. Mi mes tambe a komé pero ku hopi duele”, asina un di e personanan ku EXTRA a papia kuné ta bisa. El a splika ku prinsipalmente den e áreanan di Soto, Lagun i Barber,  outo sa trapa e bestianan aki mata. Loke ta pasa ta ku pa motibu di sekura, nan ta bin mas serka kaminda hende ta biba. Di naturalesa nan ta un poko skiu. Ta tira nan mata i si ta anochi ta pone lus fuerte riba nan i nan ta keda pará. Manera ku nan keda para den e lus ta tira nan mata, asina el a splika.

Segun e personanan ku nos a papia kuné, nan ta konsiente ku aki ta kometé algu ku ta kastigabel pa lei. Binánan di Kòrsou ta un animal protehá meskos ku diferente otro animal. Ora bisa e hendenan ku ta mata nan ku loke ta hasiendo ta ilegal, nan ta rabia. Resientemente mes hopi ta esnan ku a kome di un di nan ku a mata na altura di Wacawa. “Nos a kome dushi pero mi kurason tabata morde”, asina un di esnan ku tabata presente a bisa.

E mes ta kere ku e kolonia ta birando dia pa dia mas poko. Na  su kálkulo, a sobra den kareda di 150 biná di Kòrsou. CARMABI ta kere ku a sobra 300. “Mi ta duda den e sifra ei. Di tur manera si no tuma medida fuerte, pronto e kolonia aki lo kaba”, asina un di nan ta bisa. Por sierto ku e mesun personanan a indiká tambe ku awor aki komementu di sloke ta masha na moda den e área aki. E tin ménos karni ku galiña pero e tambe ta kome bon, asina nan ta bisa. Nan a indiká tambe ku e kolonia di sloke si a krese masha tantu mes den áreanan di Bándabou.

 

SHARE

LEAVE A REPLY