29 kas a sufri daño di kandela pa aña 2019

WILLEMSTAD.- Ayera den oranan di anochi, Kuerpo di Brantwer Kòrsou a duna un presentashon titulá “Prevenshon, e mihó Opshon” na trahadónan di MCB Bank i tambe MCB Bsure.
Den kuadro di e kampaña Prevenshon, e mihó Opshon, MCB Bsure a disidí pa komo partner djòin i stimulá prevenshon huntu ku Brantwer Kòrsou. Durante di e presentashon ku tabata na enkargo di Luzmarie Ster i tambe Fabian Janzen, Brantwer Kòrsou a presentá sifra di kandela, i a indiká ku lamentablemente sifranan ta keda oumentá.
E kuerpo a kompará sifranan di aña 2016, 2017, 2018 i tambe 2019. Durante aña 2018, tabata tin un total di 120 kas òf edifisio ku a risibí daño di kandela, sea parsialmente òf ku a kima por kompletu.
Tambe Brantwer Kòrsou a indiká, ku durante di aña 2017, un total di 3 persona a pèrdè nan bida komo konsekuensia di un kandela.
Korant EXTRA a bai bèk, i a tuma nota ku en
bèrdat tabatin 3 insidente fatal ku kandela, kual tabata na Roermondstraat, na Paraguanweg i tambe na Kaya Barbulete.
Di akuerdo ku Brantwer Kòrsou, esaki a pone ku nan komo Brantwer no a sinta ketu mas, i a aktua di forma pro aktivo pa duna nan aporte i baha sifranan di kandela diario. Durante aña 2018 tambe e sifra di kandela a oumentá i ta p’esei nan a kuminsá bai den barionan ku e kampaña prevenshon e mihó opshon pa papia ku abitantenan kon pa prevení un kandela.
Na aña 2019, MCB Bsure tambe a tuma nota di e kampaña prevenshon e mihó opshon aki, i a duna su aporte na Brantwer Kòrsou.
MCB Bsure ta mira e importansia ku kada kas di famia mester tin un seguro kontra kandela i ku kada siudadano mester ta konsiente kon pa prevení un kandela.
Durante di e anochi, Brantwer Kòrsou a trese vários tep hopi importante di kosnan ku tur persona ta hasi diario, i ku por kousa situashonnan lamentabel.
Esaki mes ta kousa, ku te ku 11 di yüni 2019, un total di 29 kas a kima por kompletu òf a risibí daño di kandela. Lamentablemente ku na momentu di e presentashon, Brantwer Kòrsou a indiká ku no tabata tin sifra fatal relashoná ku esaki, pero manera EXTRA a informá, e kaso na Jan Luis a konosé un víktima fatal, e promé pa e aña aki kaminda e habitante ku a bai Colombia despues di a risibí kemaduranan a konsekuensia di e kandela aki a fayesé djamars na Colombia.

SHARE

LEAVE A REPLY