Den otro kaso di transporte ilegal di inmigrantenan, den luna di yüni 2022, tambe den e siudat di Texas, 46 persona a pèrdè nan bida den e kònteiner bisto riba e potrèt. Nan a stek muri despues di a keda oranan largu será den e kònteiner, sin ventilashon.
HOUSTON (AFP).- Outoridatnan di Texas a haña 23 migrante indokumentá skondí den un trùk den zùit di Texas, frontera di Merka ku Méhiko, na momento ku e gobièrnu di Trump ta realisá razianan i deportashonnan masivo. E suseso a tuma lugá dia 28 di novèmber, ora ku agentenan a para shofùr di un trùk ku tabata sirkulá sin number apropiá pa e tipo di vehíkulo. Riba un video difundí pa outoridatnan, por mira e shofùr ku ta baha for dje trùk i ta bisa ku e ta su so.
E agentenan a revisá e kabina ku yudansa di un kachó, ku a detektá presensia di mas hende. Personal di DPS a listra den e kabina i a topa ku 23 persona skondí, tratando di hendenan for di El Salvador, Guatemala, Honduras, Nicaragua i Méhiko. E vehíkulo no tabatin karga.
E shofùr a keda detené i den kaso ku hañ’é kulpabel di tráfiko di hende, e por risibidó un kastigu mínimo di dies aña di prizòn, segun leinan di Texas.
Den 2022, 53 migrante a muri despues ku a laga nan den un treiler sin èrko i esei na momento ku tabatin temperatura haltu na San Antonio, Texas. Gobièrnu di Trump ta sigurá ku e krusamentu di frontera via di kamindanan no outorisá a baha te na un mínimo durante di su mandato, miéntras ku e ta sigui ku un kampaña masivo di detenshon i deportashon di migrantenan.
Trump a hasi su lucha konta di inmigrashon iregular komo un gran prioridat, menshonando un “invashon” di Merka di parti di “kriminalnan ku ta bini di otro pais”. Su gobièrnu ta asosiá kriminalidat ku inmigrashon klandestino. Pero segun un informe dje instituto Cato, di tendensia liberal, solamente 5% di personanan detené pa polis di inmigrashon for di inisio dje aña fiskal dia 1e di òktober a yega di risibí kondena pa aktonan di violensia i den kareda di 70% no tin ningun kondena.
