BERLIN, ALEMANIA, AFP.- E laboratorionan BioNTech i Pfizer a bisa djárason ku e vakuna kontra Coronavirus ta 100% efikas pa hóbennan entre 12 i 15 aña.
E ensayonan di fase 3 ku a inkluí 2.260 adolesente di Merka a mustra “100% efikasia di e vakuna i un reakshon sólido di antikurpa”, segun indikashon di ámbos empresa den un komunikado.
“Nos kier presentá e datonan aki na FDA komo proposishon pa outorisá e vakunanan komo uso di emergensia den e siguiente simannan i asina vakuná e grupo di edat aki promé ku e aña eskolar nobo”, asina e direktor ehekutivo di Pfizer, Albert Bourla a bisa.
E vakuna di BioNTech/Pfizer ta usa teknologia ARNm i tabata e promé vakuna kontra COVID-19 aprobá den paisnan oksidental na fin di aña pasá.
Tantu Merka komo Union Europeo a aprobá esaki su uso pa esnan riba 16 aña. Miónes di adulto a haña e vakuna aki den mas di 65 pais.
