Raichel St. Jacoba
Mañan djadumingu dia 21 di yüni ta dia di tata. I den e kuadro aki nos a papia ku Raichel St. Jacoba, un tata ku ta edukando su yunan, su so. E tin 2 yu muhé i un yu hòmber ku e ta sumamente orguyoso di dje i ta papia positivo di nan.
Por mira Raichel hopi riba media sosial, kaminda por siguié i su yu muhé ku resientemente a partisipá na elekshon di reina di beyesa tiner. El a konta Djasabra ku ser tata p’e ta karga responsabilidat di loke el a prokrea. El a pone yunan na mundu i tin di karga responsabilidat di ta ehèmp’el pa nan. I tambe e ta huntu ku su yunan den e diferente partinan di bida, momentu felis i ménos felis. Den tur loke su yunan ta hasi ku ta bon e ta sostené nan i esnan ménos bon e ta mustra nan kiko si por hasi. Ser tata pa Raichel no ta kria so, pasobra kria ta bin di mes den nos kultura i p’e tata ta muchu mas ku duna sèn fin di luna, pero bo mester t’ei ku bo yunan.
Tur mi yunan tabata planiá
Raichel a splika nos ku el a plania pa tin yu i esei ta konta pa tur su yunan. For di esun promé te e di tres. Esun promé e ta kòrda e tabata malu un temporada i tabata asina erg ku el a kere e no ta bai sobrebibí. I el a disidí di traha su promé yu pa e laga un yu pa su mama i pa e mama di e yu mes. Pero el a sana. E di dos yu a fayesé i tabata yu hòmber. E ginekólogo a bisa nan pa no keda sin traha un yu mesora pa evitá kana kaminda di sikólogo i asina el a traha su otro yu muhé., I na último el a traha su yu hòmber di 8 aña. Su promé yu tin 16 aña, e di dos 9 i e di tres 8 aña.
Bira tata
Bira tata no ta nifiká ku bo ta haña un buki di instrukshon kon pa ta un tata. E ta kòrda ku el a bai diferente training kon pa ser un tata. E kier a duna su yunan i voral esun grandi sufisiente tempu pa e no faya. I p’esei el a warda algun aña promé el a traha e di dos yu. E promé yu e tei na tur loke e partisipá den dje. I ora e tabata sufisiente madurá komo tata, e tabata kla pa su di dos yu.
Tur tres yu ta igual
Ku dos yu muhé i un yu hòmber, Raichel a konta nos e diferensia den lanta e yu muhé i lanta e yu hòmber. E yunan muhé ta mas trankil, ta mas brasa i duna amor i e yu hòmber ta mas aktivo. E ta mas futbòl, kore den kurá i mas fuerte. E yu hòmber tòg tambe ta duna hopi amor pasobra el a mira su rumannan muhé. E muchanan muhé bo mester ta mas p’endiente pa nan i e yu hòmber si ta semp’er kla pa yuda. Straf ta forma parti di e edukashon ku e ta duna su yunan i e ta straf e yunan muhé i esun hòmber igual. El a bisa di nos ta biba den un komunidat kaminda ta laga e mucha hòmber hasi loke e ke pasobra e ta mucha hòmber i e yu muhé ta keda protehá un tiki mas tantu. Pero e yu hòmber ei tambe tin di bai dil ku su yunan i p’esei tur ta haña straf igual. I den su kaso e dos yunan mas chikí ta haña straf huntu pasobra kaminda esun ta, e otro tambe ta. Si esun muhé hasi algu fout, esun hòmber ta kuné i p’esei e kastigunan ta igual. I ku un sonrisa Raichel a bisa ku e ta haña asta ku pa e yunan no ta straf nan ta haña pasobra ta huntu nan ta tòg.
E desafio semp’er ta keda
Raichel a bisa ku e sa papia fuerte ku su yunan sigur ora e kosnan no bai bon, pero tambe e por ta hopi lif ku su yunan. E ta un tata su so ku su yunan. El a bisa ku tin un liña pa premia e yu ora e ta bon pero hala e liña ora e ta fout. Pero mester kòrda ku ta abo mes tei atrobe i p’esei no por keda hopi rabia ku e muchanan pasobra den su kaso ta e so tei ku nan. Tur esaki ta un desafio p’e, kon pa atendé. Raichel tampoko ta kompartí e pensamentu ku ora bo ta un mayor bo so, ta bisa ku ta bo mes ta mama i tata. El a splika nos ku e no a imaginá su mes ku e so lo mester a lanta su yunan. Pero ora a yega e momentu debí na sirkunstansianan e mester hasié pasobra e yunan ta dep’endé di dje. Esei ta nifiká karga responsabilidat. E ta un desafio pasobra ta otro idioma tin di papia ku mucha muhé i e tin dos. Kòrda ku mucha muhé ta pasa den diferente etapa den bida, ku nan regla ets ets i e ta otro ku e yu hòmber ku bo sa kiko e lo pasa aden pasobra abo tambe ta hende hòmber. Internèt sinembargo ta yuda hopi, ounke e desafio ta keda.
Duna hopi amor
Raichel a bisa ku e ta hopi p’egá ku su mama i loke e ke hinka den su yunan ku el a haña na su kas ta hopi amor. Raichel ta e úniko yu hòmber i pa kolmo esun di mas chikí i tin 3 ruman muhé mas grandi. El a lanta ku su mama den kas i e tabata e yu mas protehá. Tur kos tabata hasi p’e i el a haña hopi amor for di chikí i esei ta loke el a kana kuné i sòru pa su yunan nunka sinti falta di amor.
Pidi desp’ensa ora bo no tin rason
Raichel ta konta ku tin kos ku el a hasi ku e no ke pa su yunan hasi. Tin erornan ku el a yega di hasi ku e no ke su yunan pasa den meskos kuné. Meskos el a yega di rabia siendo e no tin rason pero e ta bai bèk i pidi desp’ensa pasobra e tabata fout. E ta bai bèk pasobra tur mayor ta hasi fout i hopi no ta bai pidi desp’ensa. Su yunan semp’er ta puntra dikon i den e dikon ei tin bia e no tabatin rason. El a bisa ku tur bia ku e rabia ta duele pasobra e ta hopi p’ega ku su yunan. Pero despues e ta bai bèk i papia ku nan. I tin bia el a papia inhustamente i esei ta duele i p’esei e ta bai bèk i papia ku e yunan. Nan tambe por pasa den dje i p’esei importante pa pidi desp’ensa.
Un inspirashon pa otro tatanan
Media sosial tin hopi influensia riba hóbennan entre otro. Raichel mes ta basta riba media sosial i el a bisa ku e ta usa media sosial komo un albùm pasobra e ta kòrd’e tur aña di nobo. Tin bia esaki ta dun’é inspirashon. Su media sosial tabata un albùm p’e i su yunan pa asina un dia e no tei mas e yunan por keda kòrda riba dje. El a sigui bisa ku su publikashonnan riba media sosial a kuminsá hasié inspirashon pa hopi tata. E ta haña hopi mensahe di tata, organisashonnan i skolnan i a bira kompletamente otro kos ku e no tabata prepará p’e. Su media sosial a yuda hopi pa habri wowo di mama i tata i pa mustra ku un tata mester tin derechi di ta den bida di nan yunan. Ora e tarda di post hende ta manda mensahe pa sa ta dikon. Pero di otro banda su yunan no ta konektá ku media sosial. E yu muhé mas grandi, esei ta e ta manehá su media sosial p’e. E yu di dos Raichel a krea un página p’e pasobra e kier a lansa un marka di paña pero finalmente a haña e yu muchu chikí pa e hasi e kos ei. E ta manehá nan media sosial pa nan, e ta e brain tras di nan media sosial, a ta interkambiá di pensamentu huntu i asina ta dil ku e media sosial.
Duna e tata chèns pa ta den bida di su yu
Riba e punto ku Raichel a bisa ku tatanan tambe mester ta den bida di nan yunan i mester duna e chèns aki, el a bisa ku su mundu ta drei rònt di mucha, e ta atendé su muchanan ku komportashon i mayoria bia por mira ku e problemanan aki ta sali for di kas. E tata tin bia ke ta den bida di e yu pero e mama ta hasi difísil pero tambe tin kaso ku mama ke pa e tata ta den bida di e yu, pero no ta logra esaki. E mundu aki no ta pareu i ta poko desbalansá. Den nos kultura nos a lanta tende ku tata tei pa kria e yu, pa kastigá e yu. E tata ta e Boe Man di ántes. Ta hinka miedu den e yu. Tata ta esun ku ta bai traha bin kas i straf. Pero tata tambe tin emoshon i nan ke ta lif pa nan yunan. I esei el a mira kuminsá kambia den e generashon for di 1990 bin ariba. Awor tatanan ta mas aktivo den bida di yu. Pero hopi bia debí na problema di relashon ku ta kaba, e mayornan no por dil ku otro i ta perhudiká e yunan. Tur problema di mama i tata den bida di yu ta bin di relashon ku a terminá. Pero e konosé famia ku a separá pero ora mira nan den bida di nan yu ta impagabel. Raichel ta topa hopi kaso den skolnan i den opvangnan.
Mi mes a siña mi yu kana modela
Raichel su yu muhé a sali ganadó di reina di beyesa di tiner. E ta konta ku ta for di 6 aña e yu a kuminsá den e kompetensianan di beyesa. E tempu ei Raichel tambe a sera konosí ku e mundu ei. E tempu ei e yu mester a kompetí pa Little Miss World na Punta Cana. Tabata entrenamentu mas intensivo i e tabata sinti ku nan tabata poko pisá. I el a kuminsá subi YouTube pa wak kon e misnan ta kana i asina e tambe por a guia su yu for di na kas. Asina e ku e yu a klek hopi i asta Raichel a kumpra un kámara pa saka potrèt di e yu i el a drenta e mundu di beyesa. Raichel ta kòrda ku un di e elekshonnan tabata na El Salvador pero e no por a haña ticket i e yu mester a bai ku su wela i Raichel a keda Kòrsou. Pero riba e di dos dia el a haña mensahe di e mènedjer bisando ku e yu no ta esun ku el a mira aki. I e no sa kon Raichel ta hasi pa yega. E mester a bai henter un kaminda, aki i aya pa asina por a yega El Salvador. Raichel a bai ku e yu mas chikí. I por a mira ku e yu a kambia mesora. Einan el a mira ku den e mundu di beyesa su presensia tabata importante. I awor den Miss Teen el a haña konfirmashon realmente di kiko e ta nifiká pa su yu. Den entrevista i riba pasarela e yu a bisa algun kos ku a toka Raichel. Meta final di e yu muhé ta pa yega Miss Universe i esei Raichel ta konsiente di dje.
Aktivo den bida di mi yunan
I ku esaki Raichel a bisa ku e otro dos yunan tambe e ta mesun aktivo ku nan. E yu hòmber ta hunga futbòl i esun muhé di dos ta esun mas prufia i a bai kanta despues tènis. E no ta para un kaminda, e ta konsiente ku e yu ta manera e mes. Pero e yu a bisé awor ku e ke bai direkshon di modelá. Raichel ta aktivo den bida di tur su yunan pero esun mas grandi ta nota mas pasobra e ta mas riba media sosial.
E regalo mas grandi ta tempu hinká den e yunan
Teniendo na kuenta ku e tin dos yu muhé, tabata interesante pa sa ki tipo di pareha Raichel lo ke pa su yunan. E ta kòrda palabra di su yu muhé ku a bisa ku e ke pa su pareha ta e mesun bon tata ku tata ta. I esei Raichel ke laga atras, kiko bo tata a nifiká pa bo. El a regalá su yunan asina tantu kos ku nan no ta kòrda. Ku tempu nan ta lubidá mes kuantu kos nan a haña regalo, pero e tempu ku a hinka den nan ta inmoral. I esei ta loke e ke laga su yunan kuné. Pa su yu hòmber bin un bon tata i e muchanan muhé haña un bon hòmber pa ta un bon tata pa nan yunan. I ounke e ta mustra un tata eksigente, e ta konsiderá su mes un tata amigu. E ta interkambiá di pensamentu ku su yunan i dor di ta nan amigu, nan ta papia di nan pensamentunan promé nan bai hasi. E ke pa su yunan tin libertat pa skohe.
I den su mensahe final Raichel a bisa;
Mi ke bisa bosnan den bida di bosnan yunan, bosnan ta hasiendo un tremendo trabou, Mi sa ku e no ta fásil, pero bo tambe tin di dil ku bo emoshonnan. Sigui ku e bon trabou. I e tatanan ousente no ta lat ainda pasobra ora bo bira grandi ta bo yunan lo bin bèk. I tempu ta mas importante ku material.
